Бізнесмен Іван Цырульнікаў выставіў на продаж свайго сабаку — дзевяцігадовага ёркшырскага тэр’ера Бусю. За жывёлу мінчук хоча атрымаць 45 базавых велічынь (1147,5 рубля). Менавіта такі штраф Цырульнікаў атрымаў пасля таго, як зайшоў з сабакам у гіпермаркет “Карона” на вуліцы Кальварыйскай у Мінску і пачаў спрачацца з аховай крамы і міліцыянтам.
Канфлікты паміж пакупнікамі і аховай здараліся ў “Кароне” і раней. Самы гучны з іх скончыўся для аднаго з наведвальнікаў крамы страсеннем мозга і траўмай пазваночніка. Пакупнікі распавядаюць, што даказаць сваю правату ў міліцыі амаль немагчыма: на выклік звычайна прыязджаюць супрацоўнікі РУУС Фрунзенскага раёна, дзе знаходзіцца гіпермаркет, і ахоўнікі размаўляюць з імі як з сябрамі.
Увечары 21 студзеня Цырульнікаў зайшоў у “Карону”, каб наведаць прыбіральню. Сабака ішоў побач з ім. Ахоўнік, які сустрэўся мужчыне, запатрабаваў, каб ён тэрмінова выйшаў з будынка, бо з сабакамі там знаходзіцца нельга. Цырульнікаў праігнараваў яго і пайшоў па сваіх справах, а на выхадзе з прыбіральні яго ўжо чакалі той самы ахоўнік і міліцыянт. Калі ж мужчына пайшоў да іншага выхада з гандлёвага цэнтра, там таксама чакала ахова.
“Па пастанове Савета міністраў, уваходзіць у краму з сабакам увогуле забаронена, — каментуюць Еўрарадыё ў “Кароне”. — Дакументы ёсць на 1-й і 37-й касе, можаце прыйсці і азнаёміцца. Уваход з жывёламі забаронены на любыя гандлёвыя аб’екты незалежна ад таго, харчовыя тавары ці не. Гэта паўсюль так, не мы прыдумалі гэтыя правілы”.
На Івана аформілі паперы ў гандлёвым цэнтры, а пасля адвезлі ў Фрунзенскае РУУС. Мінчук прызнаў, што парушыў правілы гандлёвага цэнтра, і пагадзіўся са штрафам за выгул сабакі ў неналежным месцы. Міліцыянты сказалі, што ён можа ісці дамоў.
“Міліцыянты ўжо сказалі, што я магу ісці дадому. Але я сказаў, што хачу напісаць сустрэчную заяву на ахоўнікаў і прайсці медычную экспертызу, каб пасля ніхто не сказаў, што я быў нападпітку, бо ахоўнікі яўна перавысылі свае паўнамоцтвы, пачаўшы мяне збіваць. Пасля гэтых маіх слоў усё рэзка змянілася”, — распавёў Еўрарадыё Цырульнікаў.
Івана адвезлі на агляд (алкаголю ў крыві не знайшлі), а пасля вяртання ў РУУС сказалі здымаць рэмень і выцягваць шнуркі з чаравікаў. Пасля мужчына апынуўся ў “малпоўніку”, дзе правёў усю ноч. На раніцу яго чакаў суд, які прызначыў дату пасяджэння: 29 студзеня.
Да гэтага часу мінчук падрыхтаваўся, знайшоў адваката і быў гатовы даказваць сваю невінаватасць. Аднак не атрымалася:
“Я патрабаваў праглядзець відэа, якое я здымаў падчас спроб затрымання ахоўнікамі, патрабаваў адводу суддзі, хацеў дамагчыся больш падрабязнага разгляду справы — ва ўсім адмовілі, — распавядае Цырульнікаў. — Падчас пасяджэння паказалі відэа з гандлёвага цэнтра, на якім нічога не бачна! Толькі ўрыўкі, дзе я заходжу, потым размаўляю з ахоўнікам, пасля іду да выхаду, і тое, як падыходзяць ужо супрацоўнікі дэпартамента аховы. Чамусьці зніклі ўсе кадры “працы” ахоўнікаў!”
Паказанні, якія ахоўнік “Кароны” і міліцыянт давалі ў судзе, захаваліся ў матэрыялах справы:
“...Я ўбачыў, як самастойна па 2-м паверсе гандлёвага цэнтра бегае сабака. Пазней я ўбачыў грамадзяніна, а таксама тое, што побач з ім і бегае сабака, — распавядае ахоўнік. — Я падышоў да гэтага грамадзяніна, ветліва павітаўся з ім, запытаўся ў яго, ці яго гэты сабака. На гэта ён адказаў мне: “Табе якая справа”. Далей я папрасіў грамадзяніна ўзяць сабаку на рукі, на што ён адказаў, што сабаку браць на рукі не будзе. Я патлумачыў, што на 2-м паверсе знаходзяцца крамы з адзеннем і бытавой тэхнікай, а таксама тое, што сабака можа пашкодзіць маёмасць крам. На што ён адказаў мне: “Ты такі ж як сабака”. Я вырашыў, што працягваць дыялог з ім не варта і выклікаў супрацоўніка міліцыі…”
“... Я падышоў да гэтага грамадзяніна, ён на мяне ніяк не рэагаваў. Я прадставіўся, на што ён адказаў мне, што са мной не размаўляе. У прынцыпе, гаворка ў яго была нармальная. Яму пачалі распавядаць, што нельга знаходзіцца ў гандлёвым цэнтры з сабакам, і папрасілі яго пакінуць гандлёвы цэнтр. На што ён проста развярнуўся і пайшоў у іншы бок. Мы пайшлі за ім, пачалі яго папярэджваць, што ў яго будуць непрыемнасці, навошта яму гэта ўвогуле трэба…”
У выніку штраф — 45 базавых велічынь (1147,5 рубля). Каб заплаціць яго, бізнесовец апублікаваў у “Інстаграме” аб’яву пра продаж сабакі:
Што праўда, у размове з Еўрарадыё Іван прызнаўся, што не збіраецца прадаваць сваю Бусю. Мужчына абскарджвае прыгавор, які лічыць несправядлівым, а сваім постам хоча прыцягнуць увагу да сітуацыі.
Намеснік старшыні ЛДПБ Алег Гайдукевіч некалькі гадоў таму кіраваў Фрунзенскім РУУС Мінска. Ён кажа, што гэта абсалютна нармальная практыка, калі міліцыянты, якія выйшлі на пенсію, “знаходзяць сябе ў ахоўнай дзейнасці”. Частка з іх, натуральна, можа ўладкавацца на працу ў “Карону”. Таму не трэба здзіўляцца добрым ўзаемаадносінам аховы ГЦ і міліцыянтаў — цалкам магчыма, усяго пару гадоў таму яны ўвогуле працавалі разам.
“Не думаю, што існуе нейкая змова супрацоўнікаў аховы [“Кароны”] з міліцыяй, — працягвае Гайдукевіч. — Дзеля чаго? Што можна ад гэтага атрымаць? Закон ёсць закон. Калі нешта не так, дык трэба, безумоўна, прыцягваць да адказнасці такога ахоўніка. А з міліцыяй ахова абавязаная мець кантакт, бо яны [ахоўнікі.
— Еўрарадыё] не могуць прымяняць фізічную сілу, а павінны выклікаць праваахоўныя органы, каб прымаліся нейкія меры.
Ахова сапраўды будуе добрыя ўзаемаадносіны з міліцыяй, бо затрыманыя за крадзеж паступаюць у органы ўнутраных спраў. Ахова не можа прыцягваць да адказнасці ці нешта яшчэ рабіць”.