Цэнтрвыбаркам адмовіўся ад працэдуры здачы падпісных лістоў, якую прапанаваў штаб Віктара Бабарыкі.
Штаб прэтэндэнта на прэзідэнцкую пасаду заўважыў, што ў выбаркамах падпісныя лісты прымаюць, запісваючы ў журнал іх колькасць. Пры гэтым журнал можа быць зроблены са звычайнага сшытка з непрашытымі і непранумараванымі аркушамі.
Каманда Бабарыкі вырашыла пераканацца, што камісія будзе правяраць менавіта тыя лісты, якія здаў каардынатар, і парадак адбору лістоў будзе такі, як паказана ў пратаколе камісіі. Таму яны падрыхтавалі праграму, якая рыхтуе суправаджальныя лісты, дзе прапісана, якія прозвішчы змяшчаюцца ў падпісных лістах і які парадак размяшчэння падпісных лістоў.
Аднак ЦВК адпрэчыла прапанову: "Так званыя "суправаджальныя лісты", якія рыхтуюцца камандай для здачы разам з падпіснымі лістамі і ўтрымліваюць прозвішчы выбаршчыкаў з гэтых лістоў і нумарацыю падпісных лістоў, не маюць ні прававога, ні фактычнага значэння".
У заяве Цэнтрвыбаркаму падкрэсліваецца, што працэдура прыёму падпісных лістоў прадугледжаная ў дапаможніку для тэрытарыяльных камісій, зацверджаным пастановай ЦВК ад 20 красавіка 2020 года №7.
Прыём і пералічэнне здадзеных падпісных лістоў адбываецца ў прысутнасці каардынатара ініцыятыўнай групы, які здае гэтыя лісты. Дата прыёму падпісных лістоў і іх колькасць завяраюцца асабістымі подпісамі як члена тэрытарыяльнага выбаркаму, які прыняў падпісныя лісты, так і каардынатара. Яны распісваюцца ў журнале рэгістрацыі ўваходных дакументаў камісіі.
Каардынатар ініцыятыўнай групы мае права сфатаграфаваць старонку журнала са згаданымі звесткамі.
"Вышэйназваная працэдура ў адрозненне ад прапанаванай камандай Бабарыкі В.Д. гарантуе поўную захаванасць здадзеных у камісіі падпісных лістоў", — запэўніваюць у ЦВК.
Цэнтрвыбаркам рэкамендуе камандзе Бабарыкі не перапісваць у суправаджальныя лісты прозвішчы выбарцаў, а рабіць копіі здадзеных падпісных лістоў. Самі суправаджальныя лісты выбаркамы будуць пакідаць без увагі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.