Карпарацыя Microsoft запусціла онлайн-сервіс, які “чытае” эмоцыі людзей па іх здымках. Праграма аналізуе твар па 8 эмоцыях: гнеў, пагарда, агіда, страх, шчасце, спакой, смутак і здзіўленне, а пасля выводзіць іх у суадносінах, сума якіх роўная адзінцы.
Распрацоўшчыкі папярэджваюць, што праграма працуе ў эксперыментальным рэжыме і таму атрыманыя дадзеныя не заўсёды дакладныя. Тым не менш Еўрарадыё вырашыла пратэставаць новы сервіс на беларускіх палітыках і чыноўніках.
Аляксандр Лукашэнка падчас пятай інагурацыі. Праграма паказвае, што кіраўнік дзяржавы спакойны і… засмучаны.
А вось эмоцыі Лукашэнкі, калі ён распавядае пра расійскія базы.
“Я назіраю ў апошні час енкі нашай апазіцыі наконт размяшчэння расійскай авіябазы на тэрыторыі Беларусі. Я нічога пра гэта не ведаю. Чалавек, які павінен прымаць такое рашэнне, я, пра гэта нічога не ведаю”, — кажа Лукашэнка.
Лідзія Ярмошына спакойная на ўсіх фота. Нават на тых, дзе яна ідзе “ратаваць ЦВК падчас Плошчы”.
Мікалай Лукашэнка на 70-й Генасамблеі ААН быў таксама спакойны, а вось яго "сусед", кіраўнік МЗС Уладзімір Макей, па версіі праграмы, ― вельмі злы.
Прэм’ер-міністр Андрэй Кабякоў часта выглядае шчаслівым.
Надзея Каткавец распавядае пра модныя трэнды і брэнды. На яе твары выраз шчасця, спакою і… агіды.
Падчас рэгістрацыі кандыдатаў у прэзідэнты шчаслівай выглядае толькі Таццяна Караткевіч. Былы кандыдат у прэзідэнты Сяргей Гайдукевіч і прадстаўнік Аляксандра Лукашэнкі Міхаіл Орда адчуваюць спакой і засмучэнне.
А вось што адчуваюць апазіцыянеры на мітынгу супраць расійскіх ваенных авіябаз. Уладзімір Някляеў ― агіду, шчасце і спакой. Мікалай Статкевіч — агіду, спакой і здзіўленне. А вось Анатоль Лябедзька спакойны і засмучаны.
А вось яшчэ адна публічная персона - Яўген Крыжаноўскі: Праграма ўбачыла на яго твары агіду, злосць і спакой.
А каб чытачы не сумняваліся, што праграмка паказвае чыстую праўду, вось яшчэ адзін з самых шчаслівых людзей, намеснік старшыні праўлення Нацбанка Зміцер Лапко прэзентуе новыя грошы. Шчасце амаль 100%!