Самая небяспечная краіна для жанчын і Дарвін, які разбэшчвае дзяцей — #ІхНоравы

Еўрарадыё

19/09/2024 - 17:25

Свет

Замежныя навіны / @rubanau_collage

У Чачні прапануюць забараніць Дарвіна, а ў Пакістане тата надзеў на галаву дачкі вялікую камеру, каб быць упэўненым у яе бяспецы.

Пакуль свет страчвае розум, як умее, нямецкія навукоўцы даказалі, што сабакі не толькі — лепшыя сябры чалавека, але яшчэ і здольныя лекары.

Больш падрабязна пра гэта і не толькі чытайце ў нашай пастаяннай рубрыцы "Іх норавы".

Пітон на кухні

64-гадовая жыхарка Тайланда дзве гадзіны змагалася з чатырохметровым пітонам, які спрабаваў яе задушыць, і ў выніку выжыла.

20-кілаграмовая змяя напала на Аром Арунродж вечарам, калі тая мыла посуд у сябе дома. Пітон прабраўся на кухню і ўкусіў жанчыну за нагу, а потым пачаў абвівацца вакол яе цела.

Тайка клікала на дапамогу, але ніхто не прыйшоў. Потым яна паспрабавала адбіцца ад змяі, схапіўшы яе за галаву, але гэта не дапамагло. Праз паўтары гадзіны крыкі Аром пачула суседка і выклікала паліцыю.

Па прыбыцці паліцэйскія ўбачылі, што жанчына сядзіць на падлозе, а вакол яе бледнага цела абвіўся пітон. Вызваліўшы пацярпелую, ратавальнікі даставілі яе ў бальніцу. Там яна мае прайсці лячэнне ад укусу змяі.

Занадта небяспечны Пакістан

Пакістанец прымацаваў на галаву дачкі вялікую камеру відэаназірання, якая дапамагае адсочваць яе перамяшчэнні.

Чытаць болей: Две белки отжали поезд у британцев, а Маск перекрыл вид на Вселенную — #ИхНравы

Па словах бацькі, ён зрабіў гэта дзеля бяспекі дзяўчыны, якая не пратэстуе супраць такога рашэння.

Пакістанка расказвае, што яе бацькі турбуюцца ў сувязі з нядаўнім забойствам дзяўчыны ў Карачы і агульнай высокай рызыкай гвалту, таму і спрабуюць усяляк уберагчы яе. Свайго бацьку яна называе "асабістым ахоўнікам".

Дарэчы, у Пакістане ў выпадку сексуалізаванага гвалту адказнасць ускладаецца на жанчын. Часткай патрыярхальнай культуры з'яўляецца "праверка цнатлівасці". Пакістан стабільна ўваходзіць у спісы самых небяспечных краін свету для жанчын, а па дадзеных ААН займае 164-ы радок з 167 у пераліку найбольш жорсткіх да жанчын дзяржаў.

У лютым гэтага года мінакі ў Пакістане напалі на жанчыну за надпісы на яе вопратцы. Ім падалося, што на сукенку нанесеныя радкі з Карана. Натоўп заклікаў абезгаловіць жанчыну за блюзнерства.

Байкот Дарвіну!

Экс-прэм'ер Чачні Муслім Хучыеў прапанаваў прыбраць тэорыю Дарвіна са школьнай праграмы. На яго думку, яна духоўна разбэшчвае дзяцей.

Палітык кажа, што вучэнне Дарвіна ілжывае, і ўсе рэлігіі прызнаюць яго памылковым.

— Хто яшчэ мусіць гэта прызнаць, каб гэта прыбраць з падручнікаў і не ўкладваць у свядомасць нашых дзяцей? — пацікавіўся Хучыеў.

Чытаць болей: Анна Делви сверкает браслетом на лодыжке, а статуи носят слинги — #ИхНравы

Эвалюцыйнае вучэнне Чарльза Дарвіна заключаецца ў тым, што чалавек, як і іншыя жывыя арганізмы, з'явіўся натуральным шляхам і з часам эвалюцыянаваў у адпаведнасці з навакольнымі ўмовамі. Галоўныя рухаючыя сілы паводле тэорыі — спадчынная зменлівасць, натуральны адбор і барацьба за існаванне. Гэтыя асновы былі сфармуляваныя ў 1859 годзе. Навука прызнала тэорыю Дарвіна, а вось духавенства — не.

Болесуцішальныя сабакі

Сабакі могуць дапамагчы людзям, якія адчуваюць хранічны боль. Пра гэта гаворыцца ў даследаванні Берлінскага ўніверсітэта імя Гумбальта, апублікаваным у часопісе Acta Psychologica.

Паводле звестак нямецкіх навукоўцаў, калі сабака проста знаходзіцца побач з чалавекам, адно гэта можа станоўча паўплываць на ўспрыманне і адчуванне болю, а таксама на яго паводзіны. Высновы былі зробленыя на падставе эксперыментаў.

У адным з іх, напрыклад, удзельнікі павінны былі апускаць руку ў ледзяную ваду. Аднак умовы мяняліся — чалавек у гэты момант быў зусім адзін, побач з ім знаходзіўся хтосьці з сяброў, альбо ў трэцім выпадку — сабака.

Як высветлілася, прысутнасць блізкага чалавека ніяк не ўплывала на суб'ектыўныя адчуванні, а вось знаходжанне побач любімай жывёлы заўважна зніжала інтэнсіўнасць болю і памяншала стрэс.

— Узаемадзеянне з сабакам дае не толькі эмацыйную падтрымку, але і сапраўды змяншае фізічны боль, — кажа аўтар даследавання Хайдзі Маўэрсбергер.

Паводле яе слоў, гэтыя вынікі адкрываюць перспектывы для распрацоўкі новых метадаў тэрапіі — сабакі маглі б дапамагаць пацыентам пераносіць боль у медустановах, да прыкладу, падчас аперацый, а таксама ў хатніх умовах.

Чытаць болей: Патоп у Еўропе і смерць самай старой коткі ў свеце — #ІхНоравы

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут

full version of the page