У Польшчы адбыўся "пераварот"? У чым сутнасць канфлікту вакол Канстытуцыйнага трыбунала

Увечары 30 кастрычніка перад будынкам Канстытуцыйнага трыбунала сабраліся праціўнікі ўрада і змен і складзе суда. Нехта казаў пра "дзяржаўны пераварот" — гэтыя словы актыўна падхапілі беларуская і расійская прапаганды і ўжо распавядаюць амаль што пра рэвалюцыю ў Польшчы. Але што адбываецца насамрэч?

Жорсткі палітычны канфлікт разгарнуўся вакол Канстытуцыйнага трыбунала. Яшчэ ў 2015-м Сейм з большасцю партыі "ПіС" абраў трох суддзяў на месцы, на якія папярэдні склад парламента ўжо законна абраў іншых. Дональд Туск і ягоныя саюзнікі крытыкавалі палітызацыю Трыбунала і абяцалі аднавіць яго незалежнасць. Крытыкавалі тыя падзеі таксама суд ЕС і ЕСПЧ.

Пасля перамогі кааліцыі на чале з Тускам Сейм абраў новых суддзяў, але прэзідэнт Караль Наўроцкі (якога падтрымлівае "ПіС") не прыняў прысягу ў часткі з іх. Яны прынеслі яе ў Сейме без фізічнай прысутнасці прэзідэнта. У выніку кіраўнік Трыбунала Багдан Свянчкоўскі (прызначэнец "ПіС") не дапускаў новых суддзяў да працы. 

І вось 30 кастрычніка адна з іх, Анна Корвін-Пятроўская, абвясціла пра часовае адхіленне ад выканання службовых абавязкаў Свянчкоўскага і ягонага намесніка. Таксама Корвін-Пятроўская выклікала паліцыю — "каб забяспечыць бяспеку суддзяў".

У пятніцу каля Трыбунала сабраліся праціўнікі такіх зменаў, у тым ліку вядучыя палітыкі "ПіС". Наўроцкі праз гэтыя падзеі перапыніў палёт у Сенегал: ягоны самалёт развярнуўся над Іспаніяй і вярнуўся ў Польшчу. Ужо ўначы прэзідэнт прыйшоў у будынак Трыбунала. Але вынікам яго візіту стала відэа супрацьстаяння з некаторымі суддзямі, а не рашэнне канфлікту.

Пад раніцу Наўроцкі абвясціў пра тэрміновыя кансультацыі з прадстаўнікамі парламенцкіх сілаў. Ці дамовяцца яны пра нешта — вялікае пытанне.