Бяздомныя сабакі ў Наваполацку / petitions.by
Жыхары Наваполацка папрасілі мясцовую ўладу адлавіць зграю агрэсіўных сабак, якая наводзіць страх на людзей. Петыцыя была створаная на сайце petitions.by. Улады адказалі, што працуюць над адловам жывёл, але сабакі "хутка і хаатычна перамяшчаюцца".
Праблема з сабакамі ўзнікла ў горадзе з лістапада 2023-га. Зграя, у якой сабакі памерам з нямецкую аўчарку, нападала на катоў па ўсім горадзе, паводзілася агрэсіўна. Навапалачане адзначылі, што звароты ў службу 115 не вырашылі праблемы. Петыцыя была створаная 27 чэрвеня. Пад ёй падпісаліся больш за 20 чалавек. 8 ліпеня зварот быў накіраваны ў гарвыканкам.
Адказ гарадскіх уладаў з'явіўся 23 ліпеня. Яго падпісаў намеснік старшыні гарвыканкама Андрэй Адзіночкін. У дакуменце гаворыцца, што камунальнікі займаюцца адловам бяздомных жывёл паводле графіку з 8:00 да 17:00, але рэйды па гэтай зграі ладзяць і ўначы.
"Па заяўках, якія паступілі ў адзіную дыспетчарскую службу 115 аб знаходжанні на тэрыторыі горада Наваполацка безнаглядных сабак, неаднаразова праводзіліся рэйды, усталёўваліся клеткі-пасткі. Праз тое, што сабакі хутка і хаатычна перамяшчаюцца, хаваюцца, складана ажыццявіць іх адлоў па заяўцы, якая паступіла", — гаворыцца ў афіцыйным адказе.
Таксама ў дакуменце гаворыцца, што пры выездзе па трох заяўках на 115 сабак ужо не знаходзілі. А ў двух выпадках сабак бачылі брыгады па адлове, але тыя "ўцяклі з тэрыторыі".
Ад пачатку года ў Наваполацку злавілі 47 бяздомных сабак, іх перадалі ў аб'яднанне абароны жывёл "Добрыя рукі".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут