Расійскі пасол у Беларусі Міхаіл Бабіч падчас паездкі ў Віцебск пракаментаваў заяву МЗС нашай краіны. У гэтым абласным цэнтры ён наведаў абутковае прадпрыемства "Белвест".
15 сакавіка начальнік ўпраўлення інфармацыі і лічбавай дыпламатыі МЗС Беларусі Анатоль Глаз на просьбу ria.ru выказаўся пра інтэрв'ю Бабіча, якое напярэдадні з'явілася на сайце гэтага расійскага інфармагенцтва. Каментар атрымаўся даволі жорсткі. У Мінску лічаць, што Міхаіл Бабіч дагэтуль "не зразумеў розніцы паміж федэральнай акругай і незалежнай дзяржавай" (ён працуе ў Беларусі з верасня 2018-га). Што расійскі дыпламат "рэгулярна хапаецца" за "падтасаваны набор лічбаў" і гэта "ператварае яго ў рахункавода альбо падаючага надзеі бухгалтара".
"Мабыць, гэта і ёсць верх дыпламатычнай школы, пра якую гаварылася ў гэтым каментары, — цытуе словы Бабіча, сказаныя ў Віцебску TUT.by. — У яго форме для нас нічога дзіўнага няма. Але за формай трэба разумець змест. А змест такі, што, я ўпэўнены, гэтая "пена" сыдзе. Галоўнае, каб мы маглі аб'ектыўна ацаніць аргументы і расійскага боку, і беларускага боку, выпрацаваць ўзаемапрымальнае рашэнне на карысць нашых народаў. А ўсё астатняе — балбатня". А да яе Бабіч ставіцца спакойна.