Колькі выдаткуюць грошай на 3 ліпеня?
/ @rubanau_collage
Улады пачалі актыўна закупляцца да Дня незалежнасці Беларусі. На 3 ліпеня рыхтуюць феерверкі, сцяжкі, канцэрты, музыкаў і многае іншае. Еўрарадыё паглядзела, колькі дзяржаўныя арганізацыі гатовыя выдаткаваць на падрыхтоўку да свята.
Асноўныя святочныя мерапрыемствы традыцыйна пройдуць у сталіцы. Як пісала "Зеркало", летась на арганізацыю Дня незалежнасці ў Мінску выдаткавалі больш за 690 тысяч рублёў. Сёлета сума вырасла ў два разы.
Адна толькі арганізацыя параду будзе каштаваць амаль 422 тысячы рублёў. Яшчэ больш выдаткуюць на канцэрт "Героям-вызваліцелям, памяць на стагоддзі" — 628 тысяч рублёў.
Матэрыяльна-тэхнічнае забяспечанне мерапрыемстваў ля Палаца спорту абыдзецца ў 155 тысяч рублёў.
Яшчэ каля 50 тысяч рублёў у суме аддадуць на розныя паслугі: транспарт, арэнду намётаў, пражыванне і харчаванне ўдзельнікаў канцэртаў і гэтак далей.
А на феерверк вылучаць каля 300 тысяч рублёў
Разам, каб арганізаваць свята ў Мінску, з бюджэту вылучылі не менш за 1 мільён 555 тысяч рублёў. Гэта толькі тое, што мы знайшлі.
У Брэсцкай вобласці на вясёлыя агеньчыкі ў небе плануюць выдаткаваць 35 тысяч рублёў. Не як у Мінску, але таксама прыстойна.
Крыху сціплей сябе паводзяць чыноўнікі з Віцебскага аблвыканкама — на феерверк на плошчы Перамогі яны выдаткуюць 15 тысяч рублёў. Столькі ж каштуе піратэхнічнае шоу ў Гродне.
Таксама ў топе Бяроза: тут на салют гатовыя раскашэліцца на 11 тысяч рублёў. Нават у Магілёве выдаткуюць менш — 10 тысяч.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут