Патоп у Еўропе і смерць самай старой коткі ў свеце — #ІхНоравы

Чытаць болей: На Шри-Ланке лучше не ловить бабочек, а во Франции — не красить волосы. #ИхНравы

У Чэхіі самая цяжкая сітуацыя ў паўночна-ўсходніх рэгіёнах. У пацярпелых раёнах разбураныя дамы і масты, пашкоджаныя дарогі. У панядзелак па ўсёй краіне без электрычнасці засталося сто дваццаць тысяч хатніх гаспадарак. Тысячы людзей эвакуяваныя.

У Польшчы з берагоў выйшлі рэкі Одэр і Вісла. Некаторыя населеныя пункты праз высокі ўзровень вады аказаліся ў ізаляцыі. Людзей давялося ратаваць з дапамогай верталётаў. Каб абараніцца ад паводкі, улады Кракава раздавалі жыхарам мяшкі з пяском.

У сталіцы Аўстрыі, дзе разлілася рака Вена, абмежаваны рух транспарту. Да некаторых дамоў можна дабрацца выключна на лодках. Раёны вакол горада абвешчаныя зонай бедства, людзей таксама эвакуююць.

Паводле экспертаў, такія ападкі звязаныя са змяненнем клімату не толькі ў Еўропе, але і на іншых кантынентах.

Вакцына ад ліхаманкі Заходняга Ніла

Навукоўцы лабараторый IrsiCaixa ў Барселоне працуюць над вакцынай ад ліхаманкі Заходняга Ніла, якая перадаецца праз укусы камароў. Спецыялісты дагэтуль не могуць зразумець, чаму ў адных людзей хвароба працякае бессімптомна, а іншыя ад яе паміраюць.

Чытаць болей: Макрон появится в сериале, а Свифт определилась, за кого голосовать — #ИхНравы

— Мы імкнёмся да таго, каб вакцына была высокаэфектыўнай што ў прадухіленні развіцця захворвання, а таксама ў прадухіленні інфекцыі, — расказвае навуковы супрацоўнік IrsiCaixa Хорхе Карылья. — Мы імкнёмся да вакцыны, якая ахоплівае разнастайнасць віруса, бо гэта вірус, які цыркулюе па ўсім свеце. І перш за ўсё мы хочам, каб яна працавала ў людзей з вышэйшай рызыкай развіцця цяжкай хваробы. Мы гаворым пра пажылых людзей, пра людзей з трохі саслабленай імуннай сістэмай.

Еўрасаюз даў на распрацоўку вакцыны больш за пяць мільёнаў еўра. Працэс можа цягнуцца ад 3 да 8 гадоў.

Скрадзеныя брыльянты

У Парыжы невядомы зламыснік напаў на спецыяліста па каштоўных камянях. Мужчына хаваўся сярод смеццевых кантэйнераў у двары офіса, дзе працаваў гемолаг, на плошчы Маршэ-Сэнт-Анарэ.

Дачакаўшыся, калі работнік выйдзе на двор, злачынец атакаваў яго і забраў сумку. У ёй былі брыльянты і ювелірныя вырабы на суму звыш 1 млн еўра.

Французская паліцыя пачала расследаванне гэтай справы.

Самая старая котка

У Брытаніі памерла самая старая котка ў свеце. Розі (так яе звалі) было 33 гады, і яна была неафіцыйнай рэкардсменкай.

У 2023 годзе прадстаўнікі Кнігі рэкордаў Гінеса прапаноўвалі ўладальніцы Лайле Брысет афіцыйна надаць Розі тытул найстарэйшай коткі, але гаспадыня адмовілася.

Жанчына ўзяла котку з прытулку ў 1990-я. Розі была асцярожнай і спакойнай, у апошнія гады амаль заўсёды спала.

— Ёй было не вельмі добра, і аднойчы яна проста выйшла ў калідор дома, легла і памерла. Я так па ёй сумую, — прызналася 73-гадовая Брысет.

На сёння самай старой коткай афіцыйна прызнаная Флосі з Вялікабрытаніі. Зусім хутка ёй споўніцца 29 гадоў.

Да нядаўняга часу галоўнай рэкардсменкай была кошка Крэм Паф з Тэхаса — яна жыла з 1967-га да 2005 года, то-бок 38 гадоў.