pexels.com
Напярэдадні ўступнай кампаніі беларускія ВНУ апублікавалі кошт навучання на 2019/2020 навучальны год. Будучыя студэнты ўжо могуць азнаёміцца са свежым цэннікам на айчынную адукацыю. А тыя, у каго ўжо ёсць студэнцкія білеты, могуць трохі пасумаваць над новымі лічбамі.
Галоўная тэхнічная ВНУ краіны размеркавала ўсе спецыяльнасці на дзве цэнавыя групы. Вучоба падаражэла на ад 308 да 328 рублёў. З поўным спісам спецыяльнасцяў і іх кошту можна азнаёміцца на сайце БНТУ.
Частка спецыяльнасцяў энергетычнага, спартыўна-тэхнічнага, будаўнічага, аўтатрактарнага і іншых факультэтаў цяпер каштуе 3380 рублёў. А вось за спецыяльнасці на архітэктурным, прыборабудаўнічым, горнай справы і іншых факультэтах, прыйдзецца заплаціць 3605 рублёў.
У Беларускім дзяржаўным эканамічным універсітэце, незалежна ад спецыяльнасці, першакурснікам прыйдзецца плаціць за навучанне 2564 рублі. Кошт навучання на ўсіх спецыяльнасцях павялічыўся на 101 рубель.
У Акадэміі кіравання "цэннік" таксама на ўсіх адзін — 3200 рублёў. У параўнанні з 2018 годам вучоба ў "прэзідэнцкай" акадэміі падаражэла на 300 рублёў.
У педуніверсітэце першакурснікам даражэй за ўсё абыдзецца навучанне па спецыяльнасцях "Музычнае мастацтва, рытміка і харэаграфія" і "Музычнае мастацтва і сусветная мастацкая культура" — 2800 рублёў. Яны падаражэлі ў параўнанні з папярэднім годам на 300 рублёў.
"Выяўленчае мастацтва і камп'ютарная графіка" і "Выяўленчае мастацтва, чарчэнне і народныя мастацкія промыслы" каштуюць крыху менш — 2774 рублі, яны падаражэлі на 298 рублёў.
Спецыяльнасці з вывучэннем замежнай мовы будуць каштаваць 2666 рублёў за першы курс, усе іншыя — 2594 рублі.
Год навучання для першакурснікаў Мінскага дзяржаўнага лінгвістычнага ўніверсітэта на факультэтах англійскай, нямецкай, кітайскай моў і культуры, раманскіх моў і перакладчыцкага факультэта, а таксама факультэта міжкультурных камунікацый будзе каштаваць 2790 рублёў. У мінулым годзе за іх давялося б аддаць 2490 рублёў.
Самыя дарагія спецыяльнасці ў "кузні IT-кадраў" — на факультэце камп'ютарных сістэм і сетак. Кошт навучання для першакурсніка за першы год складзе 3430 рублёў. У параўнанні з 2018 годам спецыяльнасць падаражэла на 220 рублёў.
На факультэтах камп'ютарнага праектавання, радыётэхнікі і электронікі і інфакамунікацый навучанне падаражэла на 285 рублёў, у параўнанні з 2018 годам, і цяпер складае 3040 рублёў.
Навучанне на факультэце інфармацыйных тэхналогій і кіравання і інжынерна-эканамічным факультэце цяпер каштуе 3390 рублёў. Бацькам давядзецца заплаціць на 320 рублёў больш у параўнанні з папярэднім годам.
У прыёмнай камісіі Беларускага дзяржаўнага медыцынскага ўніверсітэта Еўрарадыё расказалі, што пакуль не могуць назваць актуальныя цэны на навучанне, паколькі з Міністэрства адукацыі яны яшчэ не прыйшлі. У 2018 годзе вучоба тут каштавала ад 2550 рублёў за першы курс на спецыяльнасці "Медыка-прафілактычная справа" да 3250 рублёў на "Стаматалогіі".
Таксама пакуль невядомы новыя кошты ў БДУ.