Міністэрства надзвычайных сітуацый не плануе ліцэнзаваць дзейнасць роўпджампераў ці нейкім чынам кантраляваць бяспеку падчас скачкоў на вяроўцы. На думку афіцыйнага прадстаўніка МНС Віталя Навіцкага, гэта папросту немагчыма:
"Роўпджампінг — гэта толькі адзін з відаў экстрымальных забаў, а іх з кожным годам робіцца ўсё больш і больш. Рэгуляваць падобную сферу наўрад ці магчыма ў любой краіне свету, — лічыць Віталь Навіцкі. — Ёсць атракцыёны, якія вырабляюцца прамысловым спосабам з адпаведнымі сертыфікатамі бяспекі. І гэта тэма для рэгулявання дзяржавай: праверка спраўнасці, падрыхтоўка персаналу і іншае. А ёсць абсалютна любыя віды экстрымальных забаў. Усе апісаць немагчыма, бо ўвесь час прыдумляецца нешта новае. Існуе шмат відаў тых жа скачкоў: і з парашутамі, і з адмысловымі пускавымі прыладамі, і проста на вяроўках, і гэтак далей. Адпаведна, гэта проста пытанне таго, каму вы давяраеце сваё жыццё".
Большасць з тых, хто займаецца роўпджампінгам прафесійна, прайшлі альпінісцкую падрыхтоўку. Некаторыя арганізатары групавых скачкоў скончылі курсы прамысловых альпіністаў і маюць адпаведныя сертыфікаты. Аднак, як заўважае Віталь Навіцкі, "сертыфікат да скачкоў дачынення не мае".