Былога міліцыянера Ягора Емяльянава не вызвалілі пасля 30 сутак арышту, далі яшчэ 10 сутак, паведамляюць праваабаронцы. У жніўні 2020-га капітан адмовіўся ўдзельнічаць у падаўленні пратэстаў у Наваполацку і звольніўся з міліцыі. 20 траўня Емяльянава затрымалі на яго новым працоўным месцы — у сталічным фітнэс-цэнтры. З розніцай у трое сутак адбыліся два суды, прысуды — па 15 сутак арышту (нібыта, "хуліганіў", а пасля "непадпарадкаваўся" міліцыянерам).
Вядома, што Ягора Емяльянава змяшчалі ў карцар.
У суботу былы міліцыянер не выйшаў на волю, бо яго "перазатрымалі": вывезлі з ІЧУ ў Савецкае РУУС, а ён "аказаў непадпарадкаванне службовай асобе, не хацеў выходзіць з машыны, упіраўся нагамі, хапаўся рукамі".
21 чэрвеня справу Емяльянава разглядаў суд Савецкага раёна Мінска. Ён атрымаў 10 сутак. Агулам ужо будзе 40 сутак арышту.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут