Алесь Бяляцкі / Белсат
"Няма ніякіх падставаў казаць пра адлігу", — так праваабаронца Алесь Бяляцкі ацаніў сітуацыю ў Беларусі.
Лаўрэат Нобелеўскай прэміі міру выступіў на Саміце свабоды ў Вільні. Гэты форум быў прысвечаны падтрымцы дэмакратычных рухаў у свеце і абароне людзей ад рэпрэсіяў, піша праваабарончы цэнтр "Вясна".
Гаворачы пра сітуацыю з правамі чалавека ў Беларусі, Бяляцкі падзякаваў усім, хто дамагаецца вызвалення палітвязняў рэжыму Лукашэнкі. Ён заклікаў да салідарнасці з беларускім дэмакратычным грамадствам.
Бяляцкі расказаў, якія крытэры выпрацавалі беларускія праваабаронцы для ацэнкі сітуацыі:
— вызваленне палітвязняў;
— магчымасць для беларускіх грамадзян, якіх выслалі і якія выехалі, бесперашкодна вярнуцца ў Беларусь;
— спыненне рэпрэсіяў і палітычна матываванага пераследу ва ўсіх формах;
— мараторый на рэпрэсіўнае заканадаўства.
"Нам мала вызвалення палітычных зняволеных, нам неабходная свабода", — падкрэсліў праваабаронца.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут