Беларусы не хочуць ваяваць ва Украіне, але не супраць саюза з Расіяй

Чытаць болей: Сацыёлаг: Толькі 26% беларусаў не ўсведамляюць сябе савецкімі людзьмі

Напрыклад, калі яшчэ ў 2018 годзе ў сярэднім 60% беларусаў выступала за тое, каб жыць у саюзе з Расіяй, у 2019-м колькасць ахвочых знізілася да 50%, ну, а ў 2020-м і зусім ўпала да 45.

Затым настроі людзей мяняліся, але з верасня 2022-га па травень 2023-га яны застаюцца нязменнымі: нягледзячы на выразную пазіцыю па ўводзе беларускіх войскаў ва Украіну, сёння каля 53,5% беларусаў выступаюць за тое, каб жыць у саюзе з Расіяй.

"Вось гэта і ёсць выклік, — кажа сацыёлаг. — Цяпер нам важна зразумець: гэта часова або стаўленне беларусаў да Расіі будзе паляпшацца? А можа, адбылося насычэнне грамадства прарасійскімі арыентацыямі? Альбо гэта ўжо мяжа магчымасці пранікнення ў Беларусь расійскага наратыву?..

Калі браць іншую фармулёўку пытання, калі мы пыталіся, які з варыянтаў аб'яднання Беларусі і Расіі вам больш падабаецца, то такая опцыя, як уваходжанне ў склад РФ у якасці суб'екта ва ўласна юрыдычным сэнсе, заўсёды прываблівала толькі 5% грамадзян нашай краіны. Травеньскі замер паказаў лічбу 8,7. Я спецыяльна звяртаю ўвагу, што гэта вынікі тэлефонных апытанняў, якія даюць сапраўды рэпрэзентатыўныя звесткі з улікам сельскага насельніцтва, якое мае пэўную палітычную і геапалітычную пазіцыю".

Чытаць болей: Думаем як еўрапейцы, але баімся Расіі: як беларусам наблізіцца да Еўропы

Пра пранікненне расійскага наратыву можна казаць доўга. Андрэй Вардамацкі прыводзіць адзін прыклад: у верасні 2022 года на пытанне, як беларусы ставяцца да таго, што Расія размясціла свае войскі ў Беларусі, станоўчых і адмоўных адказаў было прыкладна пароўну — больш за 40 адсоткаў на кожнае меркаванне.

"Важным тут з'яўляецца тое, што многія беларусы ва ўзросце 18+ маюць станоўчую ацэнку гэтай з'явы і ўспрымаюць расійскія войскі як нейтральныя ці нават як абаронцаў Беларусі (праўда, ніхто не кажа, ад чаго менавіта). Самае важнае, што гэта прыклад вельмі моцнага і інтэнсіўнага пранікнення расійскага наратыву ў грамадскую думку беларусаў".

Зусім хутка спецыялісты Беларускай аналітычнай майстэрні правядуць чарговы этап свайго даследавання, вынікі якога раскажуць, як змяніліся настроі беларусаў за апошні час.

"Да верасня 2022-га сутнасць дынамікі заключалася ў яе адсутнасці", — падсумаваў эксперт.