Чытаць болей: ЗША лічаць, што беларуска-расійскія вучэнні "вядуць да эскалацыі"
Дзярждэп ЗША выказвае салідарнасць з Ціманоўскай "і ўсімі іншымі, хто сутыкнуўся са спробамі рэжыму прымусіць замаўчаць крытыку". У заяве вітаюцца высілкі Беларускага фонду спартыўнай салідарнасці "па падтрымцы і абароне правоў чалавека спартсменаў ва ўмовах жорсткіх рэпрэсій рэжыму Лукашэнкі".
Варта адзначыць, што санкцыі ўводзяцца напярэдадні адкрыцця зімовай Алімпіяды ў Пекіне.
У заяве таксама адзначаецца, што ЗША "пацвярджаюць сваю падтрымку народу Беларусі і яшчэ раз заклікаюць рэжым Лукашэнкі спыніць рэпрэсіі супраць прадстаўнікоў грамадзянскай супольнасці, незалежных СМІ, палітычнай апазіцыі, спартсменаў...". Вашынгтон патрабуе ад уладаў Беларусі неадкладна вызваліць усіх палітычных зняволеных, распачаць дыялог з дэмакратычнай апазіцыяй і грамадзянскай супольнасцю, правесці свабодныя і справядлівыя выбары пад міжнародным назіраннем. Таксама выказваецца намер прыцягнуць да адказнасці вінаватых у рэпрэсіях і парушэннях правоў чалавека ў нашай краіне.
Адначасова з'явілася інфармацыя пра размову з міністрам замежных спраў РБ Уладзімірам Макеем памочніцы дзяржсакратара ЗША па справах Еўропы і Еўразіі Карэн Донфрыд (сам Энтані Блінкен не стаў з ім размаўляць). Беларускі бок быў папярэджаны (у чарговы раз), што калі Беларусь "будзе часткай плана" па магчымай агрэсіі супраць Украіны, то яна сутыкнецца з такімі ж наступствамі (санкцыямі), што і Расія. Донфрыд перадала Макею патрабаванне вызваліць больш за 1000 палітвязняў і нагадала, што санкцыі ЗША ўведзены ў тым ліку і за парушэнні правоў чалавека.
МЗС Беларусі пра гэтую размову нічога не паведаміў.