5 снежня стала вядома, што Наталля Качанава пакінула пасаду кіраўніка Адміністрацыі прэзідэнта — яе змяніў генерал-маёр КДБ Ігар Сергеенка. Адна з самых высокапастаўленых беларускіх чыноўніц у мінулым — валейбалістка, старшыня Полацкага гарвыканкама і віцэ-прэм’ер па сацыяльных пытаннях.
Кіраўніцай Адміністрацыі прэзідэнта Качанава прапрацавала тры гады. За гэты час чыноўніца зарэкамендавала сябе як праваднік паміж уладамі і народам. Напрыклад, менавіта яна ездзіла ў магілёўскі мікрараён Чапаеўка прасіць прабачэння ў цыганоў за жорсткія затрыманні і аблавы на прадстаўнікоў меншасці падчас рэзананснай справы, звязанай з самазабойствам міліцыянера.
На Наталлю Качанаву спадзяваліся і ўдзельніцы руху “Маці 328”, з якімі чыноўніца сустракалася ў Адміністрацыі. У свой час яна паабяцала, што ў наркатычны артыкул будуць унесены змены. Яе абяцанні спраўдзіліся.
Цікава, што Наталлі Качанавай давялося нават разрульваць сітуацыю з забаронай на ўезд у Беларусь адной з удзельніц Pussy Riot Вольгі Курачовай. Па просьбе Аляксандра Лукашэнкі яна давяла Курачовай, што ні да яе, ні да іншых удзельніц беларускія ўлады прэтэнзій не маюць.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут