Уначы 14 студзеня ў Бярэзінскім раёне Мінскай вобласці малакавоз МАЗ збіў 23-гадовага мінчука, які вяртаўся з дыскатэкі. Ад атрыманых траўмаў ён памёр на месцы. Трагічнае здарэнне адбылося на 110-м кіламетры аўтадарогі Мінск — Магілёў каля вёскі Навасёлкі. Як адзначае сайт sb.by, кіроўца быў цвярозы, а пешаход, які ішоў каля правага краю праезнай часткі ў спадарожным накірунку, на сваім адзенні не меў флікераў.
Вядома, што ў маладога чалавека ў Навасёлках было лецішча. На дыскатэцы ў суседняй вёсцы ён быў з сябрамі, але яны чамусьці з’ехалі без яго. Спыніць спадарожную машыну ён не змог, таму вяртаўся пешшу. Малакавоз ехаў у сталіцу з боку Магілёва. Ім кіраваў 29-гадовы жыхар гэтага горада. Распачатая крымінальная справа.