Затрыманне веласіпедыста на мінскім трыятлоне
26 чэрвеня падчас Мінскага трыятлона сілавікі затрымалі раварыста. Мяркуючы па відэа, знятаму на месцы падзеяў, гэта адбылося недалёка ад перасячэння праспекта Пераможцаў і вуліцы Ратамскай. Гэты ўчастак уваходзіць у веладыстанцыю на трыятлоне, які праходзіць паміж Мінскім морам і Палацам спорту ў цэнтры сталіцы Беларусі.
На запісе відаць, як інспектар ДАІ дае сігнал свістком і паказвае рукой у бок веласіпедыста ў чорнай форме. Іншы супрацоўнік міліцыі спыняе спартоўцу. Паміж імі адбываецца кароткі дыялог. Затрыманы злазіць з ровара і ў суправаджэнні чалавека ў міліцэйскай форме коціць яго ў бок серабрыстага мікрааўтобуса. На такіх па Мінску перамяшчаюцца сілавікі.
Пазней стала вядома яшчэ пра як мінімум два затрыманні веласіпедыстаў на Мінскім трыятлоне.
Гэта не першы выпадак затрымання мінскіх веласіпедыстаў падчас гонкі. 16 мая АМАП забраў у Мінску не менш за 10 веласіпедыстаў, якія ўдзельнічалі ў заездзе вакол Цнянскага вадасховішча. Усё пачалося з затрымання хлопца ў футболцы з Лукашэнкам. Астатнім удзельнікам гонкі сказалі нешта накшталт: "Катацца далей, але без палітыкі" — яго ў выніку пакаралі 15-ю суткамі арышту, а пазней ён стаў фігурантам крымінальнай справы за абразу Лукашэнкі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут