Турысты з Расіі акупуюць Брэст — у гатэлях кажуць, што месцаў няма

Чытаць болей: Легалайз, технорейвы, квартал красных фонарей. Идея для старых шахт Солигорска

Каб завабіць турыстаў, адміністрацыя гатэля "Эрмітаж" размясціла на сайце галерэю з фотаздымкамі ганаровых гасцей. Сярод іх — расійскія зоркі, якія падтрымалі вайну ва Украіне. Напрыклад, Грыгорый Лепс. Зрэшты, побач — Леанід Агуцін, музыкі гуртоў "Бі-2" і "Акіян Эльзы", якія выступаюць супраць расійскай агрэсіі.

Стандартны двухмесны нумар з уключаным сняданкам у гэтым гатэлі абыйдзецца наведвальнікам у 430 рублёў за суткі. Але…

— ...на жаль, свабодных нумароў для браніравання на вашыя даты ўжо няма, — кажуць у "Эрмітажы". — Увесь гатэль заселены, і так не толькі ў нас, але і ва ўсіх іншых гасцініцах. Калі хочаце, занясем вас у ліст чакання, але каб нешта вызвалілася — гэта малаверагодна.

Пасля 12-га свабодных нумароў будзе ўжо шмат.

"Хілтан" — яшчэ адзін брэсцкі гатэль з гучнай назвай. На сайце пішуць, што ў ім цэлых 120 (!) камфартабельных нумароў, але "з прычыны вялікай загрузкі" месцаў на нашыя даты тут таксама не знайшлося. Адзіны варыянт спыніцца ў "Хілтане" у гэтыя дні — гэта суткі з 8 на 9 траўня. Кошт пытання са сняданкам на дваіх — каля 350 рублёў.

Чытаць болей: Интеграция с РФ и 18 миллионов туристов. Как власти видят Беларусь к 2040 году?

Месцаў няма і ў буцік-гатэлі "Статус", аформленым у стылі лофт. Самая бліжэйшая дата браніравання — 13 траўня. Суткі ў нумары на дваіх разам са сняданкам абыдуцца тут у 330 рублёў.

А вось у гасцініцы "Інтурыст" нам прапанавалі спыніцца з 8 па 10 траўня. Бюджэтны варыянт з двума асобнымі ложкамі без сняданку абыйдзецца наведвальнікам у 60 рублёў на суткі. Больш камфортны нумар з кандыцыянерам каштуе 100 рублёў.

Такім чынам, з пяці гасцініц, у якія мы патэлефанавалі, толькі ў адной знайшоўся нумар, дзе можна спыніцца на некалькі святочных дзён. Прычым гэта аказаўся самы бюджэтны варыянт. Турыстаў з Расіі цікавяць больш дарагія нумары.

А калі зняць кватэру?

На папулярным расійскім сэрвісе для браніравання гатэляў знаходзім толькі два свабодныя варыянты апартаментаў, дзе можна спыніцца з 8 па 12 траўня. Кошт за ўвесь час знаходжання па сітуацыі на 7 траўня — 2115 і 2412 рублёў. Гэта значыць 500-600 рублёў за ноч.

Мяркуючы па ўсім, гаспадары карыстаюцца наплывам расійскіх турыстаў і зарабляюць падчас святаў. Для параўнання, чатыры ночы ў тых самых нумарах у чэрвені абыдуцца гасцям у два разы танней.

Між іншым, пакуль сэрвіс прапануе больш за шэсцьдзесят самых розных варыянтаў размяшчэння ў апартаментах на першы летні месяц. Можа быць, у гэты час і варта прыехаць у Брэст, каб паблукаць па яго падворках, паглядзець, як працуе вулічны ліхтаршчык, і адчуць сапраўдную атмасферу гэтага тысячагадовага беларускага горада.