У ЦВК дакументы на рэгістрацыю сваёй ініцыятыўнай групы на прэзідэнцкія выбары падаў інжынер-дызайнер Віталь Зялкоўскі, больш вядомы як "сур'ёзны турыст".
Зялкоўскаму 40 гадоў. Кіраўніком сваёй ініцыятыўнай групы будзе ён сам.
Гэта ўжо пяты прэтэндэнт, які падаў у Цэнтрвыбаркам дакументы на рэгістрацыю ініцыятыўнай групы. Раней заяўкі падалі Анжаліка Жалезнякова, Вераніка Мішчанка, Аляксандр Грачышнікаў, Юрый Ганцэвіч.
Вядомасць да Зялкоўскага прыйшла ў 2013 годзе: яго фота на фоне сусветных славутасцяў сталі мемам, бо беларус паўсюль фатаграфаваўся з сур'ёзным выразам твару.
Потым ён уступіў у Ліберальна-дэмакратычную партыю, але праз нейкі час пакінуў яе шэрагі. Напрыканцы 2019 года Зялкоўскі заявіў пра свае прэзідэнцкія амбіцыі. Па яго словах, тады перамовы пра падтрымку з ім вялі прадстаўнікі аргкамітэта БХД. Цяпер Зялкоўскі беспартыйны.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.