Супрацоўнікі Астравецкай АЭС будуць адпрацоўваць дзеянні на выпадак няштатных сітуацый на поўнамаштабным трэнажоры блочнага шчыта кіравання рэактарам. Пра гэта паведаміў журналістам намеснік начальніка вучэбна-трэніровачнага цэнтра Беларускай АЭС Аляксандр Ерын. Па яго словах, трэнажор уяўляе сабой поўную капію пульта кіравання.
Падчас навучання супрацоўнікаў улічаць і цяжкія, і непрадугледжаныя ў праекце надзвычайныя сітуацыі, а таксама магчымыя памылкі персаналу. Інструктары будуць наўмысна “шкодзіць” на трэнажоры, а супрацоўнікі павінны будуць вырашаць гэтыя праблемы.
Спецыялістаў для Астравецкай АЭС рыхтуюць 4 беларускія ВНУ, у якіх адкрылі 6 спецыяльнасцяў. Болей за 360 студэнтаў такіх спецыяльнасцяў ужо атрымалі дыпломы. Прыкладна траціна з іх працуе на пляцоўцы будаўніцтва, яшчэ траціна размеркаваная ў арганізацыі, якія звязаныя з абслугоўваннем ядзернай энергетыкі. Частка працуе на аб’ектах традыцыйнай энергетыкі.
На сёння на беларускай АЭС працуе 437 чалавек, 67 з іх — маладыя спецыялісты, паведамляе TUT.by
Фота: Onliner.by