Андрэй Аляксандраў / Вольга Хвоін
У адыходзячым годзе радавалі перш за ўсё людзі, прызнаўся журналіст і палітвязень Андрэй Аляксандраў у інтэрв'ю "Радыё Свабоды". Журналісты папрасілі яго расказаць аб прыемных момантах 2021 года.
Амаль увесь гэты год ён правёў у зняволенні, Аляксандрава затрымалі 12 студзеня. Яго абвінавачваюць паводле трох артыкулаў КК: у арганізацыі і падрыхтоўцы дзеянняў, якія груба парушаюць грамадскі парадак (арт. 342), ва ўхіленні ад выплаты падаткаў (арт. 243) і здрадзе дзяржаве (арт. 356). Журналісту пагражае да 15 гадоў пазбаўлення волі.
"Калі я думаю аб тым, што мяне парадавала ў 2021 годзе, я найперш думаю пра людзей, якія сёлета напісалі і адаслалі тысячы лістоў, паштовак і тэлеграмаў (ну і ня будзем забываць пра перадачы). Бадай, ніколі ў жыцьці я не назіраў такой канцэнтрацыі шчырасці, дабрыні, любові, салідарнасці, чалавечай цеплыні", — прызнаўся Андрэй Аляксандраў.
Яго ўразілі людзі, якія нават праз расчараванне і бездапаможнасць шукалі і знаходзілі сэнсы, не здаваліся і не спыняліся. Аляксандраў прызнаўся, што не расчараваўся ні ў адным чалавеку, якога лічыў сябрам.
Яго вельмі радавалі простыя рэчы: "тое, што бацькі пішуць, быццам усё ў норме (ніколі ж не прызнаюцца, калі і не); кляновы лісток ці засохлая кветачка ў лісце; калі следчы пасля допыту перадае словы кахання ад любай дзяўчыны; калі сябра піша, што ў бяспецы; калі сяброўка дасылае тэлеграму, што "Лівэрпул" забіў пяць разоў на "Олд Трафард", і цытуе гімн клюбу, які я пераклаў на родную мову: "Ты ніколі ня будзеш адзін".
І гэта адчуванне — што ты не адзін — натхняе і не дае згубіцца, заўважыў Андрэй Аляксандраў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут