21-гадовая брастаўчанка можа застацца без правоў кіроўцы на 3 гады і атрымаць вялізны штраф да 100 базавых велічынь за свае неадэкватныя паводзіны. Напярэдадні ўласнага вяселля дзяўчына зладзіла вечарынку з сяброўкамі, якія трапілі ў міліцыю. Жадаючы вызваліць сябровак, нявеста села за руль і паехала ў апорны пункт, хоць сама была нецвярозай.
Па дарозе яе затрымала ДАІ: увагу інспектараў прыцягнуў аўтамабіль, які ў 2.20 ночы ехаў па вуліцы з выключанымі фарамі. Медыцынскі агляд паказаў у крыві кіроўцы 1,3 праміле алкаголю. Адметна, што на наступны дзень у нявесты быў запланаваны ўрачысты роспіс у ЗАГСе.
Аўтамабіль быў эвакуяваны на штрафстаянку. Лёс правоў 21-гадовай кіроўцы і сума штрафу вызначаюцца, паведамляе ДАІ Брэсцкай вобласці.