Генадзь Карнеявец / фота з сацсетак
11 кастрычніка ў судзе Жыткавіцкага раёна пачнецца разгляд крымінальнай справы Генадзя Карнеяўца, піша "Флагшток". Мужчыну вінавацяць ва ўдзеле ў пратэсных акцыях, а таксама паклёпе і абразе Лукашэнкі. Па сукупнасці пакаранняў яму пагражае да шасці гадоў пазбаўлення волі.
Карнеявец актыўна посціў у сацсетках з 2016 года. Верагодна, гэтыя пасты і сталі падставай для крымінальнай справы.
Як адзначае "Флагшток", мужчына актыўна рэпосціў палітычныя публікацыі, з якіх можна было зразумець, што ён падтрымлівае "рускі свет".
Падчас "дармаедскіх" пратэстаў 2016-2017 года Карнеявец выказваў незадаволенасць беларускімі ўладамі. У 2020-м актыўна рэпосціў паведамленні, дзе крытыкавалі рэжым Лукашэнкі.
А калі расійскія войскі пачалі шырокамаштабнае ўварванне ва Украіну, Карнеявец пераключыўся на перапосты расійскай ваеннай прапаганды, забыўшыся пра беларускую тэматыку.
Пры гэтым папярэднія пасты з крытыкай рэжыму Лукашэнкі ён не выдаліў.
Паведамляецца, што старонка Карнеяўца ў сацсетцы не абнаўляецца з траўня 2024 года. 13 чэрвеня яго судзілі ў Калінкавічах, абвінаваціўшы ў распаўсюдзе "экстрэмісцкіх" матэрыялаў. Верагодна, тады ж пачалі і крымінальную справу на яго.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут