Пры разводзе супрацоўнікі загса і суддзі павінны будуць абавязкова праінфармаваць мужа і жонку пра магчымасць кантактаў з медыятарам. За такое новаўвядзенне 19 чэрвеня прагаласавалі ў першым чытанні дэпутаты Палаты прадстаўнікоў. Пытанне ўваходзіла ў законапраект "Аб змяненні законаў па пытаннях медыяцыі".
Міністр юстыцыі Алег Сліжэўскі падкрэсліў, што ў першую чаргу законапраект накіраваны на пашырэнне ўжывання медыяцыі ў сферы шлюбна-сямейных адносін.
"У выпадках, калі муж і жонка прымаюць рашэнне аб скасаванні шлюбу, суддзя або супрацоўнік загса прапануе ім правесці інфармацыйную сустрэчу з медыятарам, падчас якой ім будзе прапанавана пашукаць варыянты кампрамісу, змякчэння вострых вуглоў. Тым самым мы мяркуем, што гэта будзе дадатковая магчымасць захавання важнага для грамадства інстытуту шлюбу", — патлумачыў Сліжэўскі.
У сямейных адносінах і раней магла выкарыстоўвацца працэдура медыяцыі, але цяпер суддзі і работнікі загсаў павінны будуць абавязкова расказаць пра такую магчымасць.
Таксама ўжо некалькі гадоў у беларускіх школах рэалізуецца праект, накіраваны на практыку медыяцыі паміж школьнікамі і настаўнікамі, паміж бацькамі.
"Праводзіцца і фестываль школьнай медыяцыі, куды з'язджаюцца прадстаўнікі медыятыўных груп. Мы бачым, што гэта дае свой плён. Медыяцыя, на мой погляд, у асяроддзі непаўналетніх мае вельмі добрую перспектыву", — лічыць міністр юстыцыі.