Беларускія грамадзяне, якія пацярпелі ад тэрактаў у Бруселі 22 сакавіка, не мелі патрэбы ў шпіталізацыі і лекаваліся амбулаторна. Пра гэта ў інтэрв’ю праграме “Карціна свету” тэлеканала “РТР-Беларусь” паведаміў амбасадар Беларусі ў Бельгіі і Люксембургу Андрэй Еўдачэнка.
Па словах дыпламата, беларусам не спатрэбілася шпіталізацыя, бо яны атрымалі нязначныя траўмы.
Амбасадар рэкамендуе грамадзянам нашай краіны ў бліжэйшыя дні ўстрымлівацца ад турыстычных паездак у Бельгію. Ён патлумачыў гэта тым, што многія часткі Бруселя пакуль недаступныя — там яшчэ праходзяць пэўныя аперацыі і ёсць абмежаванні на перасоўванні. Турыстам не змогуць гарантаваць бяспеку, а таксама не дапусцяць да ўсіх славутасцяў, перадае БелаПАН.