На судзе над "групай Аўтуховіча" 22 чэрвеня пачаліся допыты пацярпелых, перадае БЕЛТА.
Першым паказанні дае міліцыянт з Ваўкавыскага РАУС. На пачатку кастрычніка 2020 года ўзарвалі яго аўтамабіль і падпалілі недабудаваны дом у Ваўкавыску.
Мужчына расказаў, што працуе ў міліцыі больш за 15 гадоў. Раней быў старшым інспектарам аховы правапарадку, а з траўня 2022-га — на пасадзе ўчастковага інспектара. У 2020 годзе міліцыянт уваходзіў у групу па растлумачэнні заканадаўства на масавых мерапрыемствах. У яго абавязкі ўваходзіў відэазапіс. У затрыманнях ён не ўдзельнічаў.
Таксама ён паведаміў, што больш за 40 разоў выступаў як сведка на адміністрацыйных судах над удзельнікамі масавых мерапрыемстваў.
Міліцыянт паведаміў, што яго фатаграфія і асабістыя звесткі былі размешчаныя ў адным з Telegram-каналаў, там была інфармацыя пра аўтамабіль, але не было звестак пра дом. Мужчына заявіў, што яму паступалі пагрозы наконт здароўя і жыцця, але не маёмасці. З пачатку гэтага суда, па яго словах, пагрозы паступалі і ягоным бацькам.
Суд над Мікалаем Аўтуховічам і яго "падзельнікамі" абвешчаны адкрытым, але праходзіць у гродзенскай турме. Трапіць на яго могуць толькі журналісты дзяржаўных СМІ. Аўтуховіча вінавацяць па 12 артыкулах Крымінальнага кодэкса, у тым ліку ў тэрарызме.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут