Былы дацэнт Мінскага дзяржаўнага лінгвістычнага ўніверсітэта Наталля Дуліна зноў асуджана на 15 сутак адміністрацыйнага арышту. На гэты раз на яе склалі пратакол за "дробнае хуліганства": "размахвала рукамі і нецэнзурна выказвалася". Затрыманне адбылося яшчэ 3 чэрвеня. Суддзя вынесла рашэнне на падставе паказанняў міліцыянера, а камеры відэаназірання вырашыла не праглядаць, нягледзячы на хадайніцтва Дулінай.
Наталля Дуліна — адна з вядучых спецыялістак у Беларусі па італьянскай мове, сябра асноўнага складу Каардынацыйнай рады. Яе звольнілі з МДЛУ восенню 2020-га пасля таго, як яна выступіла супраць гвалту сілавікоў і падтрымала студэнцкі пратэст. У 2022 годзе Дуліну затрымалі ўжо трэці раз (затрыманні былі і раней). Пасля мінулых 15 сутак яна выйшла на волю 10 траўня. Іх ёй прысудзілі за "распаўсюд экстрэмісцкіх матэрыялаў". Раней былі 15 сутак за ўдзел у антываеннай акцыі. Пасля гэтага Наталля Дуліна распавядала пра здзекі ў ізалятары на Акрэсціна.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут