Уладзімір Базанаў / АБФФ
Намесніка старшыні Асацыяцыі "Беларуская федэрацыя футбола" (АБФФ) Уладзіміра Базанава не пусцілі ў Польшчу, а яго шэнгенскую візу анулявалі. Пра гэта стала вядома рэсурсу by.tribuna.com.
Базанаў планаваў праз Польшчу трапіць у Венгрыю, дзе 27 кастрычніка жаночая зборная Беларусі па футболе праводзіла хатні матч Лігі Нацый супраць каманды Славеніі (з-за таго, што паветраныя зносіны Беларусі з краінамі ЕС перапыненыя, хатняй арэнай для беларускай каманды прызначылі стадыён у Будапешце). Дзяўчаты з беларускай зборнай ехалі ў Венгрыю праз Літву, у Вільнюсе яны перасаджваліся на самалёт. Але для Базанава, як удзельніка паслявыбарчых рэпрэсій, уезд у Літву, Латвію і Эстонію закрыты. Ён разам з міністрам спорту Сяргеем Кавальчуком, экс-кіраўніком федэрацыі хакея Дзмітрыем Баскавым і былым байцом Дзмітрыем Шакутам знаходзіцца ў санкцыйных спісах.
Выданне нагадвае, што Базанаў рэгулярна ездзіць праз Польшчу "на закупы". Дагэтуль яго не было ў санкцыйных спісах гэтай краіны. Але гэтым разам яго не ўпусцілі ў краіну і анулявалі візу. Чым польскія ўлады матывавалі сваё рашэнне, журналісты не ведаюць. Але адзначаюць, што абодва матчы: і "хатні" ў Венгрыі, і гульню ў адказ ў Славеніі Базанаў вымушаны быў глядзець у Беларусі.
Нагадаем, два гады таму, калі Базанаў яшчэ ўзначальваў АБФФ, яго папрасілі пакінуць Чэхію. Тады ён таксама суправаджаў беларускую жаночую зборную. Візу, якая тады па запыце УЕФА была выдадзена Венгрыяй, таксама анулявалі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут