Рэшткі дэкаратыўнага пано разам з будаўнічым смеццем / Наша ніва
На гістфаку БДУ падчас рэканструкцыі будынка знішчылі керамічнае пано з выявай Кастуся Каліноўскага, піша "Наша ніва". Яно размяшчалася ў адной з аўдыторый на чацвёртым паверсе. На ім быў адлюстраваны кіраўнік вызваленчага паўстання 1863-1864 гадоў разам з касінерамі.
Знішчэнне пано адбылося яшчэ да поўнамаштабнага ўварвання Расіі ва Украіну ў 2022-м. На фота відаць, што ў кучы будаўнічага смецця ляжаць фрагменты рэльефнай рамы, якая абрамляла выяву Каліноўскага.
У апошнія гады прапаганда рэжыму Аляксандра Лукашэнкі разам з расійскімі прапагандыстамі актыўна змагаецца "са створаным у савецкай гістарыяграфіі міфам пра Каліноўскага". Кіраўнік адміністрацыі Лукашэнкі нядаўна параўнаў Кастуся Каліноўскага з кіраўнікамі антысавецкага Супраціву ва Украіне Сцяпанам Бандэрам і Раманам Шухевічам. Прапаганда шалее ад таго, што ва Украіне шануюць памяць пра Каліноўскага (называюць вуліцы), што яго імя носіць беларускае падраздзяленне, якое змагаецца супраць расійскіх акупантаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут