Мінск адказаў Маскве на прапановы аб паглыбленні інтэграцыі. Пра гэта 18 красавіка заявіў міністр замежных спраў нашай краіны Уладзімір Макей, інфармуе БЕЛТА.
Напярэдадні падчас справаздачы расійскага ўраду Дзярждуме РФ прэм'ер-міністр Дзмітрый Мядзведзеў заявіў, што "беларускім сябрам перададзены... прапановы па інтэграцыі" (аднак не агучыў іх). І цяпер беларусы вызначаюцца, што для іх "з'яўляецца прыймальным, што менш прыймальным". Інтэграцыя Расіі і Беларусі павінна быць больш важкай, а супрацоўніцтва — "у канчатковым выніку ўзаемавыгадным", адзначыў расійскі прэм'ер.
Макей паведаміў, што беларускія прапановы даўно адпраўлены ў Маскву. "Мы ўжо даўно накіравалі нашы прапановы ў адказ, — кажа міністр замежных спраў Беларусі. — Яны знаходзяцца на разглядзе ў Маскве". Па словах Уладзіміра Макея, пасля вывучэння гэтых прапаноў "[сумесная] рабочая група пачне больш актыўна працаваць над рэалізацыяй нашай канцэпцыі па далейшым паглыбленні інтэграцыі".
Макей не стаў агучваць змест беларускіх прапановаў ("не трэба забягаць наперад"). Ён толькі падкрэсліў, што яны ахопліваюць усе сферы супрацоўніцтва Беларусі і Расіі.