27 студзеня Аляксандр Лукашэнка прызначыў Валерыя Малашку міністрам аховы здароўя, перадае БЕЛТА.
На гэтай пасадзе Малашка змяніў Васіля Жарко. Той 29 снежня 2016 года быў прызначаны віцэ-прэм'ерам.
Дарэчы, 43 дні таму, 15 снежня 2016 года, Малашка быў прызначаны міністрам працы і сацыяльнай абароны. Тады рашэнне прымаў таксама кіраўнік дзяржавы.
Атрымоўваецца, што 15 снежня Аляксандр Лукашэнка яшчэ не збіраўся прызначаць Васіля Жарко на пасаду віцэ-прэм'ера. Іначай было б лагічным прызначыць Малашку, які мае медыцынскую адукацыю, адразу на пасаду міністра аховы здароўя.
Малашка нарадзіўся ў 1966 годзе ў Гродне. Ён скончыў Мінскі дзяржаўны медінстытут па спецыяльнасці "педыятрыя" і Акадэмію кіравання пры прэзідэнце па спецыяльнасці "дзяржаўнае кіраванне сацыяльнай сферай".
Да прызначэння міністрам працы ён са студзеня 2009 года працаваў намеснікам старшыні Магілёўскага аблвыканкама.