Ігар Шуневіч расказаў, што нельга называць затрыманні Вячаслава Сіўчыка, Алеся Макаева ды іншых апазіцыянераў адмовай ад практыкі накладаць штрафы замест арыштаў на суткі.
“Сіўчык быў затрыманы ў п'яным выглядзе. Змена нашай тактыкі датычыла ўдзелу ў несанкцыяваных акцыях. Яна не датычыць з’яўлення ў п’яным выглядзе. Мы не гаварылі пра п’яніц на вуліцах, дэбашыраў. Мы супраць іх дзейнічаем традыцыйна. У нас няма нейкай асаблівай тактыкі супраць іх. У нас няма паддывановых гульняў. Мы дзейнічаем адкрыта, галосна. Складаем пратаколы. Перадаем іх у суд. Калі чалавек не плаціць, то ўключаецца прававы механізм”, — сказаў міністр унутраных спраў.
Ігар Шуневіч таксама патлумачыў, што пратаколы за ўдзел у шэсці да Дня Волі складаліся таму, што некаторыя яго ўдзельнікі парушылі парадак яго правядзення.