Пажар у кватэры стаў прычынай смерці мінчука, перадае БЕЛТА са спасылкай на прэс-службу Мінскага гарадскога ўпраўлення МНС.
Пажар адбыўся 19 снежня. Жыхары пад'езда ў 11.43 паведамілі ратавальнікам, што ў доме на праспекце Ракасоўскага, 103 гарыць кватэра. На месцы здарэння пажарнікі выявілі, што пажар адбыўся ў трохпакаёвай кватэры на трэцім паверсе дзевяціпавярховага жылога дома. У ванным пакоі загарэлася пралка "Індэзіт" 2007 года выпуску.
З ваннага пакоя ратавальнікі вынеслі 59-гадовага непрацуючага мужчыну. Мужчыну шпіталізавалі з апёкамі цела 1-4-й ступені (95% цела) і атручваннем прадуктамі гарэння. Раніцай 20 снежня ён памёр ад атрыманых траўмаў.
Найбольш верагоднай прычынай узгарання пралкі называюць кароткае замыканне.