Яўген Прыгожын / riafan.ru
На тэрыторыі Беларусі Яўгена Прыгожына, заснавальніка ПВК "Вагнер", няма. Пра гэта на прэс-канферэнцыі 6 ліпеня паведаміў Аляксандр Лукашэнка.
"Што датычыць Яўгена Прыгожына, ён знаходзіцца ў Піцеры. Дзе ён сёння зранку?.. Можа, зранку ў Маскву паехаў", — цытуе словы Лукашэнкі ягоная прэс-служба
Пра вагнераўцаў ён заявіў, што гэта расійская кампанія і на сёння байцы знаходзяцца ў сваіх лагерах: "У пастаянных лагерах, дзе яны знаходзіліся пасля вываду з фронту на аднаўленне".
Такім чынам Лукашэнка пацвердзіў ранейшыя звесткі, што ў Беларусь вагнераўцы пакуль што не прыбылі.
Разам з тым, ён паведаміў, што не бачыць рызыкі ад прысутнасці ПВК "Вагнер" у Беларусі: "Мяне абсалютна не турбуе, што ў нас будзе размешчаная нейкая колькасць байцоў. Калі іх трэба будзе задзейнічаць, мы іх задзейнічаем імгненна. Усе веды, якія яны назапасілі на фронце, мы разгледзім і будзем выкарыстоўваць для падрыхтоўкі".
Пасля бунту вагнераўцаў Крэмль абвясціў, што крымінальную справу супраць Прыгожына спыняюць пад умовай ягонага сыходу ў Беларусь. Таксама ахвочым вагнераўцам дазволілі перайсці ў нашу краіну. Мяркуецца, што для іх будуць вайсковы лагер пад Асіповічамі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут