Аляксандр Лукашэнка ўхваліў смяротную кару за "замах на ўчыненне акту тэрарызму". Раней гэта зрабілі Палата прадстаўнікоў і Савет Рэспублікі Нацыянальнага сходу Беларусі. У сераду дакумент апублікаваны на Нацыянальным прававым інтэрнэт-партале. Ім уносяцца змены ў Крымінальны кодэкс. Новаўвядзенне пачне дзейнічаць праз дзесяць дзён.
Мяркуецца, што згаданыя змены ўводзяцца ў тым ліку дзеля больш жорсткага пакарання "рэйкавых партызан", якія актывізаваліся ў Беларусі пасля расійскай агрэсіі супраць Украіны. Падчас затрыманняў сілавікі паранілі некалькі чалавек.
18 траўня пачнецца гучны судовы працэс над Мікалаем Аўтуховічам і групай з 11 чалавек. Некаторыя з іх абвінавачваюцца па артыкуле "акт тэрарызму".
У Еўрасаюзе устрывожаны магчымымі зменамі ў Крымінальны кодэкс РБ, згодна з якімі можа стаць магчымым пашырэнне выкарыстання смяротнага пакарання. Рэспубліка Беларусь — адзіная краіна ў Еўропе, у якой яно па-ранейшаму існуе.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут