Аляксандр Лукашэнка сваім указам прызначыў новага начальніка ўпраўлення ўнутраных спраў Гомельскага аблвыканкама. Ім стаў палкоўнік міліцыі Аляксандр Васільеў, інфармуе tut.by са спасылкай на прэс-службу кіраўніка дзяржавы.
Папярэдняга кіраўніка міліцыі Гомельшчыны — генерал-маёра міліцыі Уладзіміра Захарчука Лукашэнка вызваліў ад пасады і залічыў яго ў распараджэнне міністра ўнутраных спраў.
Васільеў вядомы тым, што ўдзельнічаў у вызваленні закладнікаў у лістападзе 2017 года. Тады ў Магілёве ў адным з аддзяленняў банка ўзброены пісталетам мужчына захапіў закладнікаў і спрабаваў абрабаваць банк. Васільеў добраахвотна пайшоў да яго ў закладнікі, а потым быў яго шафёрам.
Аляксандр Васільеў нарадзіўся 24 сакавіка 1975 года ў Магілёве. У органах унутраных спраў пачынаў служыць з пасады оперупаўнаважанага аддзялення крымінальнага вышуку ў 1994 годзе.
Перад прызначэннем у Гомельскую вобласць займаў пасаду часовага выканаўцы абавязкаў па пасадзе начальніка УУС Магілёўскага аблвыканкама.
Мае дзяржаўныя ўзнагароды: ордэн "За асабістую мужнасць" (атрыманы якраз за вызваленне закладнікаў), медалі "За бездакорную службу" 3-й і 2-й ступеняў, "За адзнаку ў ахове грамадскага парадку".