Крыніцы памянялі, а трубы — не. Ці праўда ўсе мінчане атрымалі чыстую ваду

Мінск не адчуў змены ў якасці вады пасля пераводу сталіцы на артэзіянскія крыніцы.

"Я як карысталася фільтрам для вады, так дагэтуль і карыстаюся", — расказвае мінчанка з праспекта Дзяржынскага.

Еўрарадыё спытала ў мінчан, ці пахне хлоркай з кранаў, а заадно і пра попыт на бутыляваную ваду ў прадаўцоў.

"А быў нейкі перавод наогул?”

Міхаіл жыве на Пятроўшчыне. Паводле яго слоў, вада ў доме заўсёды была дрэнная, таму яны з сям'ёй купляюць пітную. Пасля 10 студзеня (менавіта тады Фрунзенскі і Маскоўскі раёны нібыта перавялі на артэзіянскую ваду) сітуацыя не змянілася.

— Я як хадзіў у краму па пяцілітровікі, так і дагэтуль хаджу. З-пад крана заліваем толькі ў чайнік. І так, чайнік як чысцілі ад накіпу, так і чысцім. Наогул нічога не змянілася.

— Людзі аднолькава тэлефануюць. Хаця не зусім зразумела. Мы ж і ад юрыдычных асоб бяром заказы, разумееце? З фізічнымі асобамі складана... Заказаў хапае, але на цяперашні момант пакуль складана сказаць. Заявак і званкоў хапае. Магчыма, нехта ўсё роўна працягвае заказваць нашу ваду.

— А ў вас усё адно вада чысцейшая, чым артэзіянская з крана?

— Наша вада ідзе з свідравіны, плюс яна адпавядае па мінералах. Наша вада ў любым выпадку лепшая. Вядома, магчыма, у людзей пах хлору знік, але наша лепшая. І тыя, хто прывык ужо піць нашу ваду, працягнуць яе піць. Але прайшло яшчэ занадта мала часу, каб рабіць нейкія высновы.

"Трэба перарабіць усю вадасістэму ў Мінску"

Аператар з іншай службы дастаўкі расказвае, што сітуацыя стабільная і вада па-ранейшаму актыўна прадаецца.

— Заказаў менш не стала. Нічога не змянілася.

— Ага, выходзіць, людзям па-ранейшаму патрэбная чыстая вада…

— Ну, ваду хоць і перавялі на артэзіянскую, але, напрыклад, у Каменцы яна дагэтуль аддае хлоркай — такая ж дрэнная. Дзе вада першапачаткова падаецца — там добрая, а дзе далей ідзе па ўсім горадзе, то там ужо горш. Трубы ж не мянялі, і каб усюды была нармальная добрая вада, трэба перарабіць усю вадасістэму ў Мінску, у кожным доме.

— Атрымліваецца, у артэзіянскай вадзе з кранаў няма ніякага сэнсу?

— Ну, можна сказаць і так. На артэзіянскую перавялі, а трубы не памянялі, і таму ў гэтым няма сэнсу. Але людзі заказваць працягваюць.

"Кожны дзень усё адно прыходзяць новыя"

У яшчэ адной службе дастаўкі вады кажуць, што спаду кліентаў няма: некаторыя сышлі, але на іх месца прыходзяць новыя.

— Ёсць заказчыкі, якія адмаўляюцца ад нашых паслуг, бо ў іх ужо цячэ артэзіянская вада з крана, але тым не менш кожны дзень усё адно прыходзяць новыя, хто хоча бутыляванай вады. Сказаць, што ў нас паменшыўся паток прыватных асоб — не, я не магу. 

"Не ведаю, што вам сказаць"

У мінскім гарадскім водаканале не змаглі адказаць, чаму з кранаў многіх мінчан дагэтуль ідзе дрэнная вада.

— Не ведаю, што вам сказаць. Мінск пераведзены ўсюды на артэзіянскую ваду.

— А чаму ў некаторых добрая вада ўсё ж пайшла, а ў мяне — не?

— Мы ж у прынцыпе ўвесь горад пераводзілі... Калі вас нешта бянтэжыць, вы можаце пакінуць заяўку на правядзенне лабараторнага кантролю вады.

Як Мінску далі добрую ваду

10 студзеня Ммнск цалкам перавялі на артэзіянскую ваду. Раней артэзіянская вада была ў дамах большасці гараджан за выключэннем самых буйных раёнаў беларускай сталіцы — Маскоўскага і Фрунзенскага.

У пуску артэзіянскай вады з падземных крыніц узяў удзел сам Лукашэнка. І назваў гэта "найвялікшым подзвігам нашага пакалення".

— Кажуць, у нас няма карысных выкапняў. Самае вялікі карысны выкапень у нас — чыстая вада, — сказаў ён на адкрыцці.

Цалкам забяспечыць сталіцу артэзіянскай вадой абяцалі апошнія гадоў 10. Тэрміны называліся розныя: ад 2013 да 2020 года.

Напрыклад, у 2010 годзе начальнік упраўлення камунальнай гаспадаркі і энергетыкі МЖКХ Беларусі Анатоль Шагун казаў, што "калі вада ў вашай кватэры пахне хлорам — засталося пацярпець яшчэ 10 гадоў". То-бок да 2020-га. Аказалася, чакаць давялося да 2025-га.