Асудзілі на 11 гадоў за падроблены рэцэптурны бланк
Жанчына доўгі час ужывала забароненыя рэчывы і стаяла на ўліку ў лекара-нарколага. Аднойчы знаёмы перадаў ёй пусты рэцэптурны бланк, які яна запоўніла і адправілася ў аптэку, піша "Мінск-Навіны".
"Правізар вывучыла рэцэпт і папрасіла грамадзянку крыху пачакаць. Западозрыўшы нядобрае, тая пайшла. Праз некалькі дзён мінчанку затрымалі, у дачыненні да яе распачалі чарговую крымінальную справу. Віну яна прызнала, у зробленым раскаялася", — гаворыцца ў паведамленні.
Аказалася, рэцэптурныя бланкі, сярод якіх быў і прад'яўлены фігуранткай, значыліся згубленымі. Пра гэта ведалі работнікі аптэк.
Суд прызначыў ёй пакаранне ў выглядзе пазбаўлення волі на тэрмін 11 гадоў і 1 месяц у калоніі строгага рэжыму. А таксама штраф у памеры 12 000 рублёў. Акрамя таго, жанчына павінна прайсці прымусовае лячэнне ад наркаманіі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут