Канстытуцыйны суд Расіі прызнаў, што папраўкі, прапанаваныя ў Канстытуцыю, адпавядаюць Асноўнаму закону краіны. Цяпер заключэнне суда неадкладна накіроўваецца прэзідэнту Расіі Уладзіміру Пуціну.
Як піша "Новая газета", раней пакет паправак падтрымалі парламенты ўсіх 85 рэгіёнаў, Савет Федэрацыі зацвердзіў гэтае рашэнне, а Пуцін падпісаў дакумент.
У Канстытуцыі Расіі прапануецца прапісаць, што шлюб — гэта саюз мужчыны і жанчыны. Таксама ў Асноўны закон будуць уведзеныя згадкі пра бога і продкаў.
Канстытуцыйны суд палічыў законным "абнуліць" прэзідэнцкія тэрміны, што дазваляе Пуціну зноў балатавацца на выбарах пасля 2024 года. Пры гэтым КС спаслаўся на сваё ж рашэнне 1998 года, калі Барысу Ельцыну былі абмежаваныя прэзідэнцкія тэрміны.
"Канстытуцыйны суд лічыць, што рашэнне ад 1998 года па абмежаванні тэрмінаў для Ельцына не абвяргае папраўку пра абнуленне, а пацвярджае яе магчымасць", — гаворыцца ў заключэнні КС.
Агульнарасійскі рэферэндум па папраўках у Канстытуцыю прызначаны на 22 красавіка.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.