Пункт пропуску "Мядзінінкай" / @gpkgovby
У літоўскіх пунктах пропуску пачалі вяртаць у Беларусь аўтамабілі на беларускіх нумарах. З ночы патрапіць у суседнюю краіну не змаглі ўжо дзясяткі аўтамабіляў. Не пусцілі нават грамадзянку Літвы, якая была за рулём такой машыны, распавядае LTR.lt. Суразмоўца агенцтва адзначыў, што беларусы ехалі, нягледзячы на забарону. "Ім патлумачылі, што іх не пусцяць. Некаторыя ведалі, але ўсё роўна спрабавалі", — расказвае начальнік пагранпераходу "Мядзінінкай".
Да 16 жніўня па-ранейшаму можна трапіць у Літву на сваім аўто, калі ўласнік аўтамабіля сядзіць за стырном, і ў яго ёсць дзейная віза, выдадзеная літоўцамі, ці літоўскі від на жыхарства.
Шмат што таксама залежыць ад таго, які з двух памежных пунктаў вы выбераце. На пункце "Беняконі — Шальчынінкай" абмежаванні больш строгія. Там ужо здарыліся выпадкі, калі ў Літву не пусцілі ўласніка аўтамабіля на беларускіх нумарах з польскай нацыянальнай візай D і з польскім відам на жыхарства.
На пункце "Каменны Лог — Мядзінінкай" парадкі менш строгія. Там уласнікаў аўто на беларускіх нумарах ужо прапускалі і з італьянскім Шэнгенам, і з ВНЖ у Польшчы, і з польскай нацыянальнай візай D.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут