Іх норавы: Маск vs дэмакраты, бунт скандынаваў, псіхолаг для ракаў і кот Сцяпан

20/05/2022 - 11:39
Кароткі агляд сусветных навін / калаж Улада Рубанава, Еўрарадыё

Калі хочаце ведаць, што адбывалася ў свеце на гэтым тыдні, чытайце рэгулярныя агляды Еўрарадыё. А калі вам не стае добрых навін — дачытвайце іх да канца.
 

Давялі нават скандынаваў

Уладзімір Пуцін вельмі не хацеў, каб Украіна ўступіла ў НАТА. І цяпер у НАТА хоча не толькі Украіна, але і Швецыя з Фінляндыяй. Скандынавія больш не з краю. Краіны парушылі дзесяцігоддзі нейтралітэту і падалі заяўкі на ўступленне ў альянс, расказвае Wall Street Journal.

"Гэта вяртанне на Захадзе ад 30-гадовага пахмелля пасля халоднай вайны — гэтага стратэгічнага сну — да ўсведамлення таго, што свет — гэта жахлівае месца, дзе людзі будуць спрабаваць вас забіць, і чым больш вы зможаце абараняцца, тым лепш", — змрочна рэзюмуе Уільям Альберк, дырэктар па стратэгіі, тэхналогіях і кантролі над узбраеннямі ў Міжнародным інстытуце стратэгічных даследаванняў.

 

Скандинавия / pixabay

Чаму гэта важна? Калі Швецыя і Фінляндыя далучацца да альянсу, то НАТА будзе кантраляваць Балтыйскае мора — самы кароткі шлях расійскіх караблёў да Атлантычнага акіяна.

Але дарогу ў НАТА скандынаўскім краінам можа перагарадзіць Турцыя. Прэзідэнт Рэджэп Таіп Эрдаган шле празрыстыя намёкі, маўляў, не можа падтрымаць уступленне ў НАТА краін, у якіх хаваюцца тэрарысты. Гаворка пра "Рабочую партыю Курдыстана", якую ў Турцыі лічаць тэрарыстычнай. Турэцкія афіцыйныя асобы запатрабавалі, каб скандынаўскія краіны расправіліся з сеткамі, якія, па іх сцверджаннях, звязаныя з РПК.

Карацей, гэтай вясной усе дамагаюцца свайго, акрамя Уладзіміра Пуціна. У пачатку года ён патрабаваў ад ЗША і НАТА гарантый бяспекі. А кажучы пра пашырэнне НАТА на ўсход, скардзіўся:

— Сказалі адно, зрабілі іншае. Як у нас кажуць у народзе, кінулі, ну проста падманулі.

А скончылася ўсё тым, што Крэмль здолеў раззлаваць нават скандынаваў. Як у іх, у скандынаваў, кажуць у народзе, "kalla händer varmt hjärta". Гэта значыць "халодныя рукі — гарачае сэрца".

Маск супраць дэмакратаў

Ілан Маск ужо каторы тыдзень трымае твітар у напружанні і абяцае вярнуць туды Дональда Трампа, хоць упіраецца нават сам Трамп. Але на гэтым тыдні ён пайшоў далей і не проста паабяцаў вярнуць голас самому адыёзнаму рэспубліканцу — ён яшчэ і раскрытыкаваў дэмакратаў. І назваў іх партыяй "падзелу і варожасці", піша "Форбс".

Маск у твітары наогул дазваляе сабе даволі шмат чаго. Нядаўна ён нават перайшоў на модныя слоўцы, якія звычайна ёсць у арсенале правых. Ілан лічыць, што твітар занадта левы і яго выкарыстоўваюць, каб прымусіць замаўчаць правых кансерватараў.

Илон Маск / euractiv.pl

А вось якім будзе твітар пры Маску — калі афармленне здзелкі, якое зацягнулася, усё ж адбудзецца:

"Каб твітар заслужыў грамадскі давер, ён павінен быць палітычна нейтральным, што фактычна азначае ў роўнай ступені засмучаць крайне правых і крайне левых".

Перакладаем на мову беларускай палітыкі. Свабода слова — гэта калі ты аднолькава засмучаеш прыхільнікаў Пазняка, Ціханоўскай і Лукашэнкі. Напрыклад, можаш у адным сказе сказаць, што "Ціханоўская — неверагодная, санкцыі не працуюць, "Жыве Беларусь". Запомніце формулу для Беларусі будучыні.

 

"У свеце дастатку ніхто не павінен мірыцца з голадам"

Часопіс The Economist выйшаў з трывожнай вокладкай. Аўтары прадракаюць чалавецтву цяжкія і літаральна галодныя часы. Але.

"У свеце дастатку ніхто не павінен мірыцца "ні з адным дзіцем, жанчынай ці мужчынам, якія паміраюць ад голаду", — сказаў генеральны сакратар ААН Антоніа Гутэрыш, звяртаючыся да Савета Бяспекі ААН.

Мир ждёт голод? / pixabay

Гутэрыш кажа, што каля 60% усіх людзей, якія галадаюць, жывуць у краінах, закранутых ваеннымі канфліктамі. І ні адна краіна ад гэтага не застрахаваная.

"Хай не будзе сумневаў: калі Савет Бяспекі абмяркоўвае канфлікт, вы абмяркоўваеце голад. Калі вы прымаеце рашэнні аб міратворчых і палітычных місіях, вы прымаеце рашэнні аб голадзе. І калі вам не ўдаецца дасягнуць кансэнсусу, галодныя людзі плацяць высокую цану",сказаў Гутэрыш.

З харчовай бяспекай у свеце і так усё было не вельмі добра. А расійскае ўварванне ва Украіну прывяло да рэзкага скарачэння экспарту прадуктаў харчавання і выклікала рост цэн на асноўныя прадукты харчавання да 30 адсоткаў. Так, вы і самі заўважылі гэта. Але ў краінах Афрыкі і Блізкага Усходу рост цэн на прадукты харчавання адчулі яшчэ мацней.

ААН прапануе спіс дзеянняў, якія трэба выканаць, каб перамагчы голад. І першае — пакласці канец вайне ва Украіне.

 

Псіхолаг для ракаў

Навіны рынку працы. Адзін з расійскіх рэстаранаў шукае "псіхолага для жывых ракаў", піша "Эсквайр". У саіскальніка павінна быць ветэрынарная і псіхалагічная адукацыя. Ён павінен мець "добрае ўзаемаразуменне з жывымі ракамі". Сур'ёзна, яны шукаюць чалавека, які павінен гутарыць з ракамі, спяваць ім песні, гладзіць іх і дапамагаць ім прымаць водныя працэдуры.

"Уявіце, ракаў у скрынях вязуць, потым яны зачыненыя ў халодным халадзільніку. Мяса становіцца, напэўна, больш жорсткае, напружанае. А мы да працы адказна падыходзім, таму тут няма ніякіх жартаў",расказалі прадстаўнікі рэстарана выданню "Подъем".

Карацей, спецыяліст павінен будзе знаходзіць "падыходы і словы для зняцця стрэсу ракаў перад прыгатаваннем".

Мы зразумеем, калі пасля пачутага вы нейкі час не зможаце хадзіць да псіхолага. І мы, напэўна, таксама.

 

Кот Сцяпан

І да добрых навін з Украіны. Харкаўскі кот Сцяпан атрымаў міжнародную прэмію блогераў, піша "Эсквайр". Калі вы ў апошнія месяцы чыталі не толькі навіны, вы ведаеце, пра каго гаворка. Хоць не, нават калі чыталі толькі навіны, вы ўсё роўна яго ведаеце.

Кот Степан / itc.ua

Пасля пачатку поўнамаштабнай вайны ва Украіне кот разам з гаспадыняй перабраўся ў Францыю. За гэты час Сцяпан сабраў 10 тысяч долараў на дапамогу жывёлам з Украіны.

Сёння пятніца, а значыць, вы ўжо праслухалі падкаст Еўрарадыё і ў курсе галоўных сусветных навін. Так што цяпер хоць бы на пяць хвілін адключыцеся ад навінавых стужак і дазвольце сабе трошкі паглядзець на мемы з харкаўскім катом Сцяпанам. Любы іншы кот таксама падыдзе.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут

Апошнія навіны

Выбар рэдакцыі