Сцяг Ізраіля / pixabay.com
Вярхоўны суд ААН заявіў, што акупацыя Ізраілем палестынскіх тэрыторый супярэчыць міжнароднаму праву, піша ВВС. Суд заклікаў Ізраіль як мага хутчэй спыніць перасяленне на акупаваны Заходні бераг і ва Усходні Іерусалім і пакласці канец акупацыі гэтых тэрыторый і сектара Газа.
У адказ прэм'ер-міністр Ізраіля Біньямін Нетаньяху заявіў, што суд вынес "хлуслівае рашэнне".
Гэта першы выпадак, калі Міжнародны суд ААН выказаў пазыцыю адносна законнасьці 57-гадовай акупацыі Ізраілем палестынскай тэрыторыі. Заключэнне Вярхоўнага суда ААН не з'яўляецца юрыдычна абавязковым да выканання, але мае палітычную вагу.
Вывучаць гэтае пытанне Міжнародны суд пачаў па просьбе Генеральнай Асамблеі ААН. Суду прапанавалі выказацца адносна палітыкі Ізраіля ў дачыненьні да палестынцаў.
"Дзяржава Ізраіль абавязаная як мага хутчэй пакласці канец сваёй незаконнай прысутнасці на акупаванай палестынскай тэрыторыі", — заявіў прэзідэнт Міжнароднага суда ААН Наваф Салам.
Гаворка ідзе пра акупацыю Заходняга берага ракі Іярдан, сектара Газа і Усходняга Ерусаліма. Ізраіль прэтэндуе на ўвесь Ерусалім і лічыць горад сваёй непадзельнай сталіцай. Усходнюю частку горада ён захапіў у блізкаўсходняй вайне 1967 года. Суд таксама пастанавіў, што Ізраіль павінен эвакуяваць усіх сваіх пасяленцаў з Заходняга берага і з Усходняга Ерусаліма і выплаціць палестынцам рэпарацыі за шкоду, зробленую акупацыяй.
З сектара Газа Ізраіль вывеў войскі ў 2005 годзе, але вайна ў рэгіёне змяніла сітуацыю. У выніку суд пастанавіў, што Ізраіль па-ранейшаму ажыццяўляе над тэрыторыяй Газы "эфектыўны кантроль".
Суд таксама зрабіў выснову, што ізраільскія абмежаванні ў дачыненні да палестынцаў на акупаваных тэрыторыях ўяўляюць сабой "сістэмную дыскрымінацыю, заснаваную, у прыватнасці, на расе, рэлігіі або этнічным паходжанні".
"Габрэйскі народ не з'яўляецца акупантам на сваёй уласнай зямлі — ні ў нашай вечнай сталіцы Ерусаліме, ні ў нашай спрадвечнай спадчыне Іўдзеі і Самарыі (Заходні бераг), — заявіў прэм'ер-міністр Нетаньяху. — Ніякае хлуслівае рашэнне ў Гаазе не сказіць гэтую гістарычную праўду, і гэтак жа законнасць ізраільскіх паселішчаў ва ўсіх частках нашай радзімы не можа быць аспрэчаная".
Але палестынцы віталі высновы суда. Цяпер яны будуць перададзеныя ў Генеральную асамблею ААН, якая прыме рашэнне, як на іх рэагаваць.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут