Этна не спіць, а быць па-за палітыкай — гэта па-каралеўску. #ІхНоравы

Чытаць болей: Прэзідэнт, які танцуе. Рэпартаж з выступу Байдэна ў Варшаве

“Я кандыдат ад Дэмакратычнай партыі. Ніхто мяне не выцясняе. Я не сыходжу", — сказаў ён падчас гэтага тэлефанавання. Прынамсі, такія словы Байдэна перадала Бі-бі-сі ананімная крыніца.

І гэтую ж фразу Байдэн паўтарыў у лісце, які быў разасланы праз пару гадзін:

"Дазвольце мне сказаць гэта настолькі ясна і проста, наколькі я магу: я балатуюся", — сказаў Байдэн. І дадаў, што ён у гэтай гонцы да канца.

Па-сапраўднаму трывожна

Робат Валі пайшоў працаваць на японскую чыгунку.

Гэта гіганцкі гуманоід, у ім 12 метраў росту, а вочы ў яго — бутэлькі з-пад колы. Галава, праўда, як у наймілейшага робата Вал-І з аднайменнага мульціка. Толькі ў адрозненне ад Вал-І гэты гігант можа трымаць у "руках" бензапілу ці... пэндзлік.

Яго будуць выкарыстоўваць для работ на чыгунцы, калі трэба нешта паправіць або пафарбаваць. Аператар робата будзе "глядзець" праз яго вочы-бутэлькі. У кампаніі кажуць, што гэта дапаможа закрыць вакансіі, якія ўтварыліся праз тое, што насельніцтва Японіі старэе.

Калі вы ўжо абураецеся, адразу скажам, што гэты робат не толькі забярэ вашу працу. Ён яшчэ і дапаможа знізіць колькасць няшчасных выпадкаў накшталт падзення з вышыні або смяротных удараў токам. Гэта значыць, забярэ цяжкую працу, каб пакінуць вам цікавую (калі яе не забярэ чат GPT).

Правыя ў парламенце

У 2013 годзе Карамба Дыябі стаў членам нямецкага парламента — і першым дэпутатам афрыканскага паходжання ў ім. Многія назвалі той дзень гістарычным.

Але ён раздумаў балатавацца на федэральных выбарах у наступным годзе. Усяго пару тыдняў таму палітык апублікаваў абразлівыя лісты, якія атрымліваў ён і яго супрацоўнікі. Там былі і абразы, і пагрозы забіць. Дыябі кажа, што хоча праводзіць больш часу з сям'ёй і вызваліць шлях больш маладым палітыкам. Але многія, вядома, звязалі гэтае рашэнне з тымі самымі "лістамі нянавісці".

У сваіх інтэрв'ю палітык і раней казаў, што настроі ў парламенце і грамадстве робяцца ўсё больш варожымі. Ён абвінавачваў у гэтым уступленне ў Бундэстаг у 2017 годзе крайне правай папулісцкай партыі AfD.

"З 2017 года тон у нямецкім парламенце стаў больш жорсткім, — казаў Дыябі. — Мы чуем прыніжальны і абразлівы змест у іхных паведамленнях. Гэта цалкам новая сітуацыя ў параўнанні з перыядам паміж 2013 і 2017 гадамі. Гэты агрэсіўны стыль размовы з'яўляецца ўрадлівай глебай для гвалту і агрэсіі на вуліцах".

Глядзіце ўгару

Дроны загулі над самым вялікім дзейным вулканам Еўропы — Этнай. Прачнуўся адзін з найбуйнейшых яго кратараў.

На відэа можна разгледзець фантаны і патокі лавы. Паглядзіце хутчэй і вы.

Этна — адзін з самых актыўных вулканаў у свеце. Яна размешчаная на італьянскім востраве Сіцылія. Глядзіце ўгару — там прыгожа.