24 чэрвеня ЕС ухваліў сектаральныя эканамічныя санкцыі супраць уладаў Беларусі. Пад іх трапляюць нафтаперапрацоўка, экспарт калійных ўгнаенняў, банкаўская сфера, тытунёвы бізнес і тэхналогіі відэаназірання. Пра гэта піша ў Twitter аглядальнік Радыё Свабодная Еўропа/Радыё Свабода Рыкард Юзвяк.
Дакумент у бліжэйшы час будзе апублікаваны ў Афіцыйным часопісе ЕС і пачнуць дзейнічаць.
Сектаральныя санкцыі азначаюць наступныя абмежаванні:
• адносна экспарту і перадачы абсталявання, тэхналогій, праграмнага забеспячэння, прызначанага для выкарыстання ў інтарэсах уладаў Беларусі ў маніторынгу або перахопе інтэрнэту, тэлефоннай сувязі на мабільных або стацыянарных прыладах;
• адносна экспарту ў Беларусь тавараў двайнога прызначэння для іх вайсковага выкарыстання;
• адносна экспарту ў Беларусь тавараў, якія выкарыстоўваюцца для тытунёвых вырабаў;
• адносна імпарту ў Еўрасаюз нафтапрадуктаў з Беларусі;
• адносна імпарту ў ЕС калійных угнаенняў з нашай краіны;
• доступу на фінансавыя рынкі Еўрасаюз ураду Беларусі, а таксама беларускім дзяржаўным фінансавым інстытутам, субʼектам;
• Еўрапейскаму інвестыцыйнаму банку забаронена фінансаванне праектаў у дзяржаўным сектары нашай краіны.
Такое рашэнне Савет ЕС называе адказам "на эскалацыю сур'ёзных парушэнняў правоў чалавека ў Беларусі і жорсткія рэпрэсіі ў дачыненні да грамадзянскай супольнасці, дэмакратычнай апазіцыі і журналістаў". Таксама гэта рэакцыя "на прымусовую пасадку самалёта Ryanair у Мінску 23 траўня 2021 года і наступнае затрыманне журналіста Рамана Пратасевіча і Сафіі Сапегі".
Аляксандр Лукашэнка тым часам дапускае ва ўмовах санкцый увядзенне вайсковага становішча ў Беларусі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут