Еўрасаюз пакуль не абмяркоўвае зняцце санкцый, уведзеных супраць Беларусі. Час на гэта ёсць да канца года, заявіў кіраўнік МЗС Бельгіі Дідз'е Рэйндэрс.
Як інфармуе РІА "Новости", 4 верасня на нефармальным паседжанні кіраўнікоў знешнепалітычных ведамстваў краін-чальцоў ЕС абмяркоўваліся адносіны з усходнімі партнёрамі, у тым ліку і з Беларуссю.
"Цяпер мы толькі ацэньваем сітуацыю, — гаворыць Дідз'е Рэйндэрс. — У тым, што датычыць Беларусі, мы адзначаем некаторыя крокі, такія як вызваленне [паліт]зняволеных. Мы вітаем гэтае вызваленне. Але мы не прасунуліся далей, у тым ліку ў адносінах санкцый. У гэтых адносінах тэрміны заканчваюцца ў канцы года, паглядзім, якія будуць прапановы Еўракамісіі".
Міністр замежных спраў Бельгіі не выключае, што абмеркаванне зняцця санкцый з Беларусі адбудзецца ўжо пасля прэзідэнцкіх выбараў у нашай краіне (яны прызначаныя на 11 кастрычніка).
Кіраўнік МЗС Люксембурга Жан Асельборн паведаміў, што на сённяшнім паседжанні пытанне зняцця санкцый з Беларусі нават не абмяркоўвалася. Ён нагадаў, што нядаўна Еўрасаюз выключыў з беларускага "чорнага спісу" групу асобаў (24 чалавек).
Санкцыі, уведзеныя супраць Беларусі з-за парушэння правоў чалавека, рэпрэсій супраць іншадумцаў ды інш., летась былі працягнутыя да 31 кастрычніка 2015 года.
Фота: ria.ru