19 студзеня Эканамічны суд Мінска разгледзеў апеляцыю ТАА "ТУТБАЙ Медыя" на судовае рашэнне, якое пазбаўляла партал TUT.by статусу СМІ. Суд не знайшоў падставаў для адмены ўласнага рашэння.
Як піша TUT.by, з 19 студзеня 2021 года гэтая пастанова афіцыйна набывае моц і партал пазбаўляецца статусу СМІ.
У другой палове 2020 года TUT.by атрымаў чатыры папярэджанні ад Мінінфармацыі за свае артыкулы. Рэдакцыя абскарджвала іх у Вярхоўным судзе, і адно з папярэджанняў было прызнанае несапраўдным.
Аднак і тых, што засталіся, было дастаткова, каб пазбавіць партал статусу СМІ: беларускія законы дапускаюць такую магчымасць за два і больш пісьмовыя папярэджанні, вынесеныя на працягу года.
Паводле пазову Мінінфармацыі 3 снежня Эканамічны суд Мінска вырашыў пазбавіць TUT.by статусу СМІ. Рэдакцыя абскарджвала гэтае рашэнне, але безвынікова.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.