Застаецца пытанне, ці быў увогуле відэарэгістратар на шлеме байкера і ці не зваліўся ён яшчэ на пачатку канфлікту з афіцэрам ДАІ. Жонка матацыкліста Вольга перакананая, што камеры ў мужа не было.
“Цяпер ён знаходзіцца ў СІЗА, — кажа Вольга. — Стан здароўя ў яго нармальны. У яго ж была чэрапна-мазгавая траўма, але ў СІЗА ж такога абследавання, каб прайсці. Але нібы не скардзіцца. Цяпер мы чакаем даты суда. Следства скончанае, справа перададзеная ў суд, але дата пакуль не назначаная”.
18 красавіка кіроўца матацыкла Suzuki Bandit выляцеў на скрыжаванне праспекта Незалежнасці і вуліцы Казлова ў Мінску разам з інспектарам ДАІ, які літаральна вісеў на правай руцэ байкера. За тры секунды яны амаль цалкам перасеклі праспект і трапілі пад машыну інкасатараў.
Раней Еўрарадыё паразмаўляла з афіцэрам ДАІ, які прызнаўся, што не памятае акалічнасцяў здарэння і цяпер чакае аперацыі па аднаўленні чэрапа.
Байкеру прад'яўленае абвінавачванне па ч. 1 арт. 363 (супраціўленне супрацоўніку міліцыі) і ч. 2 арт. 317 (парушэнне правілаў дарожнага руху асобай, якая кіравала транспартным сродкам, што пацягнула па неасцярожнасці прычыненне цяжкага цялеснага пашкоджання) Крымінальнага кодэкса Рэспублікі Беларусь.