"Белавія" з 18 лістапада перайшла на сістэму брэндавых тарыфаў. Яна дазваляе пасажырам самастойна выбіраць набор паслуг. Таксама павялічваецца памер ручной паклажы з 8 да 10 кг.
У канцы кастрычніка новаўвядзенне анансаваў гендырэктар авіякампаніі Анатоль Гусароў. Калі раней кошт на квіток фармаваўся аўтаматычна, то цяпер пасажыры могуць выбраць тарыф (з багажом ці без багажу), што паўплывае на кошт. Цана авіябілетаў будзе залежыць і ад іншых фактараў — ад умяшчальнасці самалёта, колькасці пасажыраў.
Прэс-служба "Белавіі" інфармуе, што розніца паміж коштам квітка на безбагажны пералёт і мінімальным коштам білета з багажом па маршруце "туды-назад" складзе ад 65 еўра (у залежнасці ад накірунка). Да квіткоў, аформленых раней за 18 лістапада, выкарыстоўваюцца правілы, якія дзейнічалі на момант пакупкі.
Звяртаецца ўвага пасажыраў, што па безбагажных тарыфах ручную паклажу нельга будзе здаваць у багаж.