Ігар Б. / MOST
Беларус, якога затрымалі за прыход у міністэрства ў Варшаве з небяспечнымі прадметамі, — вядомы гродзенскі музыка Ігар Б. (польскае заканадаўства не дазваляе ўказваць прозвішча без дазволу). Пра гэта выданню MOST апавялі яго сябры.
Цяпер яны спрабуюць высветліць лёс музыкі і шукаюць адваката. Тэлефон Ігара недаступны, апошняя яго актыўнасць у сацсетках была суткі таму.
Паведамляецца, што затрыманы беларус застаецца ў паліцыі. Прэс-сакратар Варшаўскага аддзялення паліцыі KRP-I Якуб Пацыняк паведаміў выданню MOST, што 17 ліпеня матэрыялы справы будуць перададзеныя ў пракуратуру. Імя затрыманага ён не агучыў.
Як расказвала Еўрарадыё, 16 ліпеня з будынка Міністэрства сям'і, працы і сацыяльнай палітыкі ў Варшаве эвакуявалі 150 чалавек. Прылеглую тэрыторыю ачапілі, рух транспарту накіравалі на іншыя вуліцы. Прычынай стаў беларус, у сумцы якога знайшлі небяспечныя прадметы — газ, нож, тэлескапічную дубінку і сігнальную зброю.
Паведамлялася, што мужчына паводзіўся спакойна і нікому не пагражаў. Але ахова будынка выклікала паліцыю.
Пазней паліцыя паведаміла, што затрыманы беларус не меў пры сабе нічога супрацьзаконнага: усе знойдзеныя пры ім прадметы польскае заканадаўства дазваляе мець.
Сябры кажуць, што Ігар часта насіў пры сабе зброю: ён меркаваў, што яна можа спатрэбіцца дзеля самаабароны.
Раней яго ўжо затрымлівалі ў Польшчы.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут